കോട്ടയം: 10 രൂപയുടെ മൂന്ന് കള്ളനോട്ടുകൾ കൈവശം വച്ച കേസിൽ 30 വർഷം ഒളിവിലായിരുന്ന ആളെ പോലീസ് പിടികൂടി. അതിരമ്പുഴ കുന്നേപ്പറമ്പ് തോമസ് (ഉമ്മച്ചൻ-65) ആണ് പിടിയിലായത്. വയനാട് ബത്തേരിയിൽ നിന്നാണ് ഇയാളെ ക്രൈംബ്രാഞ്ച് പിടികൂടിയത്. തോമസിനെ ഇന്ന് കോടതിയിൽ ഹാജരാക്കും. കേസുമായി ബന്ധപ്പെട്ട് 1990ൽ തോമസിനെ പോലീസ് അറസ്റ്റ് ചെയ്തിരുന്നു. എന്നാൽ കേസിന്റെ വിസ്താരം കോടതിയിൽ നടക്കുന്നതിനിടെ തോമസ് കുടുംബത്തോടൊപ്പം ഒളിവിൽ പോവുകയായിരുന്നു. തുടർന്നാണ് കേസ് ക്രൈംബ്രാഞ്ചിന് കൈമാറിയത്.
തോമസിനും കുടുംബത്തിനും വർഷങ്ങളായി നാടുമായി ബന്ധമില്ലായിരുന്നു. സൈബർ സെല്ലിന്റെ സഹായത്തോടെ നാളുകളായി ക്രൈംബ്രാഞ്ച് നിരീക്ഷണം നടത്തി വരികയായിരുന്നു. ഇതിനിടെ തോമസ് കുടുംബമായി താമസിക്കുന്നതായി സൂചന ലഭിച്ചു. തുടർന്ന് നടത്തിയ അന്വേഷണത്തിനൊടുവിലാണ് ഇയാളെ അറസ്റ്റ് ചെയ്തത്. 1990ൽ താൻ പലിശക്ക് പണം കൊടുത്തിരുന്നുവെന്നും, കിട്ടിയ പലിശത്തുകയിൽ 10 രൂപയുടെ മൂന്ന് കള്ളനോട്ടുകൾ ഉണ്ടായിരുന്നത് അറിയാതെ കൈവശം വച്ചപ്പോഴാണ് പോലീസ് പിടികൂടിയതെന്നുമാണ് തോമസിന്റെ വാദം.
Comments