കൊച്ചി : നോക്കുകൂലിയുമായി ബന്ധപ്പെട്ട പരാതികളിൽ സമഗ്രമായ അന്വേഷണം നടത്തണമെന്ന നിർദ്ദേശവുമായി സംസ്ഥാന പോലീസ് മേധാവി അനിൽ കാന്ത്. പരാതികളിൽ എഫ്ഐആർ രജിസ്റ്റർ ചെയ്ത് അന്വേഷണം നടത്താനാണ് ജില്ലാ പോലീസ് മേധാവിമാർക്ക് അനിൽ കാന്ത് നൽകിയിരിക്കുന്ന നിർദ്ദേശം. നോക്കുകൂലി ആവശ്യപ്പെടുന്നവർക്കെതിരെ പിടിച്ചുപറിയ്ക്ക് കേസ് രജിസ്റ്റർ ചെയ്യാൻ ഹൈക്കോടതി ആവശ്യപ്പെട്ടിരുന്നു. ഇതിന്റ പശ്ചാത്തലത്തിലാണ് നടപടി.
നോക്കുകൂലിയുമായി ബന്ധപ്പെട്ട് പരാതികൾക്ക് അതീവ പ്രധാന്യം നൽകണമെന്നാണ് സംസ്ഥാന പോലീസ് മേധാവി പുറപ്പെടുവിച്ച നിർദ്ദേശത്തിൽ പറയുന്നത്. കേസ് അന്വേഷിച്ച് കുറ്റപത്രം സമർപ്പിക്കണം. സ്റ്റേഷൻ ഹൗസ് ഓഫീസർമാർ അവസരത്തിനൊത്തുയർന്ന് പ്രവർത്തിച്ച് പരാതിക്കാരുടെ ബുദ്ധിമുട്ടുകളും ചെയ്യാത്ത ജോലിക്ക് കൂലി നൽകേണ്ട അവസ്ഥയും ഒഴിവാക്കാൻ നടപടി സ്വീകരിക്കണമെന്നും ആവശ്യപ്പെട്ടിട്ടുണ്ട്.
കഴിഞ്ഞ ദിവസം നോക്കുകൂലി നിർത്തലാക്കണമെന്ന് ആവശ്യപ്പെട്ട് സമർപ്പിച്ച ഹർജിയിൽ രൂക്ഷ വിമർശനമാണ് ഹൈക്കോടതി ഉന്നയിച്ചത്. നേക്കുകൂലി വാങ്ങുന്നത് പിടിച്ചുപറിയാണെന്നായിരുന്നു കോടതി അഭിപ്രായപ്പെട്ടത്. ട്രേഡ് യൂണിയൻ ഭീകരത അവസാനിപ്പിക്കാൻ ചുമട്ടുതൊഴിലാളി നിയമം ഭേദഗതിചെയ്യണമെന്ന് സർക്കാരിനോടും കോടതി ആവശ്യപ്പെട്ടിരുന്നു.
Comments