ന്യൂഡൽഹി : തുടർച്ചയായ വധഭീഷണികൾ കൊണ്ട് തന്നെ ഭയപ്പെടുത്താനാകില്ലെന്ന് എം.പി.യും മുന്‍ക്രിക്കറ്റ് താരവുമായ ഗൗതം ഗംഭീർ . ഈ ഭീഷണികളെ തനിക്ക് ഭയമില്ലെന്നും ഇക്കാര്യം ഇന്റലിജൻസ് ബ്യൂറോ അന്വേഷിക്കുന്നുണ്ടെന്നും ഗൗതം ഗംഭീർ പറഞ്ഞു.
“എനിക്ക് ഒരു തരത്തിലുള്ള ഭയവും ഇല്ല. ഞാൻ ജോലി ചെയ്യുന്നതും പരിപാടികളിൽ പങ്കെടുക്കുന്നതും നിർത്തുന്നില്ല. ഈ പരിപാടിയുടെ വിജയത്തിലാണ് ഇപ്പോൾ എന്റെ ശ്രദ്ധ.” ഈസ്റ്റ് ഡൽഹി പ്രീമിയർ ലീഗിലെ ആദ്യ മത്സരം യമുന സ്‌പോർട്‌സ് കോംപ്ലക്‌സിൽ ഉദ്ഘാടനം ചെയ്ത് സംസാരിക്കുകയായിരുന്നു ഗംഭീർ.
ആറ് ദിവസത്തിനിടയില്‍ ഗംഭീറിന് മൂന്ന് ഭീഷണിസന്ദേശമാണ് ലഭിച്ചത് . സംഭവത്തില്‍ അന്വേഷണം ആരംഭിച്ച പോലീസ് ഗംഭീറിനുള്ള സുരക്ഷയും വര്‍ധിപ്പിച്ചു. വധഭീഷണി സന്ദേശമുള്ള ഇ-മെയില്‍ അയച്ചത് പാകിസ്താൻ സ്വദേശിയായ ഷാഹിദ് ഹമീദ് എന്ന വ്യക്തിയാണെന്ന് വിവരം ലഭിച്ചതായി ഡല്‍ഹി പോലീസ് പറഞ്ഞിരുന്നു .
ഡല്‍ഹി പോലീസിനും ഐ.പി.എസ് ശ്വേതക്കും ഒന്നും ചെയ്യാന്‍ കഴിയില്ല. പോലീസിലും ഞങ്ങളുടെ ചാരന്മാരുണ്ട് – എന്നായിരുന്നു മൂന്നാമത്തെ ഭീഷണി സന്ദേശം.സൈബര്‍ സെല്ലിന്റെ സഹായത്തോടെ സ്‌പെഷ്യല്‍ സെല്ലിനാണ് അന്വേഷണച്ചുമതല.
