ലണ്ടൻ: ഇംഗ്ലീഷ് പ്രമിയർ ലീഗിൽ പുതിയ പരിശീലകൻ റാൽഫ് റാഗ്നിക്കിന് കീഴിൽ മാഞ്ചസ്റ്റർ യുണൈറ്റഡ് ജയത്തോടെ തുടങ്ങി. ക്രിസ്റ്റൽ പാലസിനെ എതിരില്ലാത്ത ഒരു ഗോളിനാണ് യുണൈറ്റഡ് തോൽപ്പിച്ചത്.
ബ്രസീലിയൻ മദ്ധ്യനിര താരം ഫ്രെഡാണ് ബോക്സിന് വെളിയിൽ നിന്നുള്ള ലോംഗ് വോളിയിലൂടെ പന്ത് വലതു മൂലയിലേക്ക് തൊടുത്തത്.
ക്രിസ്റ്റ്യാനോയെ സമർത്ഥമായി പ്രതിരോധിച്ച ക്രിസ്റ്റൽ പാലസിന് പക്ഷെ ഗോളടിക്കാനായില്ല. ക്രിസ്റ്റലിന്റെ സ്വന്തം വലയിൽ ഭാഗ്യം കൊണ്ടു മാത്രമാണ് കൂടുതൽ ഗോളുകൾ വീഴാതിരുന്നത്. ജയത്തോടെ യുണൈറ്റഡ് പോയിന്റ് പട്ടികയിൽ ആറാമതായി.
ആഴ്സണലിനെ രണ്ടിനെതിരെ മൂന്ന് ഗോളുകൾക്ക് കഴിഞ്ഞ ദിവസം യുണൈറ്റഡ് തോൽപ്പിച്ചിരുന്നു. എന്നാൽ അതിന് മുന്നേ ചെൽസിക്കെതിരെ 1-1 സമനില ക്ഷീണമായി. ചാമ്പ്യൻസ് ലീഗിൽ വിയ്യാറലിനെ എതിരില്ലാത്ത രണ്ടു ഗോളിനാണ് യുണൈറ്റഡ് തോൽപ്പിച്ചത്. വാട്ട് ഫോഡിനോടും സിറ്റിയോടും തുടർച്ചയായി തോറ്റതോടെയാണ് മുൻ പരിശീലകൻ ഒലേ സോഴ്സ്ജറുടെ സ്ഥാനം തെറിച്ചത്.
Comments