മുംബൈ : ജാമ്യവ്യവസ്ഥയിൽ ഇളവ് തേടി ലഹരി മരുന്ന് കേസ് പ്രതി ആര്യൻ ഖാൻ കോടതിയിൽ. മുംബൈ ഹൈക്കോടതിയിൽ ഇളവ് ആവശ്യപ്പെട്ട് ആര്യൻ ഖാൻ അപേക്ഷ നൽകി. എല്ലാ വെള്ളിയാഴ്ചയും എൻസിബി ഓഫീസിൽ ഹാജരകണമെന്നാണ് പ്രധാന വ്യവസ്ഥ. ഇതിൽ ഇളവ് വേണമെന്നാണ് ആര്യൻ ഖാന്റെ ആവശ്യം.
നിലവിൽ കേസിന്റെ അന്വേഷണം ഡൽഹി എൻസിബിയിലെ പ്രത്യേക സംഘത്തിനാണെന്ന് ചൂണ്ടിക്കാട്ടിയാണ് ആര്യൻ ഖാൻ കോടതിയെ സമീപിച്ചിരിക്കുന്നത്.
ഈ സാഹചര്യത്തിൽ മുംബൈ ഓഫീസിൽ ഹാജരാകണമെന്ന വ്യവസ്ഥയിൽ ഇളവ് നൽകണം. എൻസിബി ഓഫീസിലേക്കുള്ള വഴിയിൽ പോലീസ് അകമ്പടി നൽകണമെന്നും അപേക്ഷയിൽ ആര്യൻ ഖാൻ ആവശ്യപ്പെടുന്നുണ്ട്. ആര്യന്റെ അപേക്ഷ ഹൈക്കോടതി അടുത്ത ആഴ്ച പരിഗണിക്കും.
ലഹരിമരുന്ന് കേസിൽ അറസ്റ്റിലായ ആര്യൻ ഖാന് ഒക്ടോബർ 28 നാണ് ഹൈക്കോടതി ജാമ്യം നൽകിയത്. ഉപാധികളോടെയായിരുന്നു ജാമ്യം. എല്ലാ വെള്ളിയാഴ്ചയും എൻസിബി ഓഫീസിൽ ഹാജരാകണം, അനുമതിയില്ലാതെ വിദേശത്തേക്ക് കടക്കരുത് തുടങ്ങി 14 വ്യവസ്ഥകൾ പാലിക്കണമെന്നാണ് ആര്യന് കോടതി നൽകിയ നിർദ്ദേശം. കേസിൽ ഒക്ടോബർ രണ്ടിനാണ് ആര്യനെ പോലീസ് അറസ്റ്റ് ചെയ്തത്.
Comments