ഗുവാഹത്തി : വാച്ചിന് പിന്നാലെ അന്തരിച്ച ഫുട്‌ബോൾ ഇതിഹാസം ഡീഗോ മറഡോണയുടെ മോഷണം പോയ കൂടുതൽ വസ്തുക്കൾ കണ്ടെടുത്ത് അസം പോലീസ്. ടി-ഷർട്ടും, ഷൂസുമുൾപ്പെടെയുള്ള വസ്തുക്കളാണ് കണ്ടെടുത്തത്. വാച്ച് മോഷ്ടിച്ചതിന് അറസ്റ്റിലായ വസീദ് ഹുസ്സൈന്റെ ബന്ധുക്കളുടെ വീട്ടിൽ നടത്തിയ പരിശോധനയിലാണ് കൂടുതൽ സാധനങ്ങൾ കണ്ടെത്തിയത്.
വാസിദ് ഹുസ്സൈന്റെ രണ്ട് ബന്ധുക്കളുടെ വീടുകളിലാണ് പരിശോധന നടത്തിയത്. ഇവിടങ്ങളിൽ നിന്നും രണ്ട് ഐ പാഡുകൾ, ജാക്കറ്റ്, ടീഷർട്ട്, രണ്ട് ജോഡി ഷൂകൾ, കളിപ്പാവ, രണ്ട് സ്‌ക്വാഷ് റാക്കറ്റുകൾ, വാച്ച്, ആറ് ലൈറ്ററുകൾ, തൊപ്പി എന്നിവയാണ് കണ്ടെത്തിയത്. ഇതെല്ലാം പോലീസ് കസ്റ്റഡിയിൽ എടുത്തു.
ഈ വസ്തുക്കളെല്ലാം മറഡോണയുടേതാണെന്ന് സ്ഥിരീകരിക്കാൻ വിദഗ്ധ സംഘം പരിശോധന നടത്തും. ഇതിനായുള്ള നിയമ നടപടികൾ പൂർത്തിയായതായി പോലീസ് പറഞ്ഞു. ശിവനഗർ പോലീസ് ആണ് പരിശോധന നടത്തിയത്.
വെള്ളിയാഴ്ചയാണ് വസീദിന്റെ പക്കൽ നിന്നും കാണാതെ പോയ മറഡോണയുടെ വാച്ച് കണ്ടെടുത്തത്. ദുബായിൽ നിന്ന് മോഷണം പോയ ഹ്യൂബ്ലോട്ട് വാച്ചാണ് ഇയാളുടെ പക്കൽ ഉണ്ടായിരുന്നത്. അന്തരിച്ച മറഡോണയുടെ സാധനങ്ങൾ സൂക്ഷിച്ചിരുന്ന കമ്പനിയിൽ സെക്യൂരിറ്റി ഗാർഡായിരുന്നു വസീദ്.
