തിരുവനന്തപുരം: അല്ലു അർജുൻ ചിത്രം തീയേറ്ററിൽ പ്രദർശനത്തിന് എത്തിയിരിക്കുകയാണ്. തെലുങ്കിന് പുറമെ ഹിന്ദി, തമിഴ്, മലയാളം, കന്നഡ, എന്നീ ഭാഷകളിൽ ചിത്രം പ്രദർശനത്തിന് എത്തുമെന്നാണ് അണിയറ പ്രവർത്തകർ അറിയിച്ചത്. എന്നാൽ മലയാളി സിനിമാ പ്രേക്ഷകരെ നിരാശരാക്കി കേരളത്തിൽ ആദ്യ ദിവസം മലയാളം പതിപ്പ് പുറത്തിറക്കില്ലെന്ന് പ്രവർത്തകർ അറിയിച്ചിരുന്നു. പകരം തമിഴ് പതിപ്പാണ് കേരളത്തിൽ പ്രദർശിപ്പിച്ചത്. പിന്നാലെ ചിത്രം കാണില്ലെന്ന് ഒരു വിഭാഗം ആളുകൾ അറിയിച്ചിരുന്നു. ഇപ്പോഴിതാ സംഭവത്തിൽ പ്രതികരിച്ചെത്തിയിരിക്കുകയാണ് സുരേഷ് ഗോപി.
തമിഴ് പതിപ്പാണ് കേരളത്തിൽ പ്രദർശിപ്പിച്ചതെന്നും ആരും ഈ ചിത്രത്തിനോട് വൈമുഖ്യമോ എതിർപ്പോ പ്രകടിപ്പിക്കരുതെന്നും സുരേഷ് ഗോപി ആവശ്യപ്പെട്ടു. സിനിമാ വ്യവസായത്തിന് തീയേറ്ററുകൾ സജീവമാകണം. ഈയൊരു പ്രതിസന്ധി ഘട്ടത്തിൽ മലയാളം – തമിഴ് എന്ന വേർത്തിരിവിൽ ആരും തീയേറ്റർ ജീവനക്കാരെയും അവരുടെ അന്നത്തെയും ബുദ്ധിമുട്ടിക്കരുതെന്ന് അഭ്യർത്ഥിക്കുന്നുവെന്ന് സുരേഷ് ഗോപി പറഞ്ഞു. ഫേസ്ബുക്ക് കുറിപ്പിലൂടെയാണ് സുരേഷ് ഗോപിയുടെ പ്രതികരണം.
ഫേസ്ബുക്ക് പോസ്റ്റിന്റെ പൂർണരൂപം ”പുഷ്പ’ എന്ന തെലുങ്ക് ചിത്രത്തിന്റെ തമിഴ് പതിപ്പാണ് കേരളത്തിലെ തീയേറ്ററുകൾ പ്രദർശിപ്പിക്കുന്നത്. ഈ സാഹചര്യത്തിൽ ആരും ഈ ചിത്രത്തിനോട് ഒരു വൈമുഖ്യമോ എതിർപ്പോ പ്രകടിപ്പിക്കരുത്. സിനിമ വ്യവസായത്തിന് തീയേറ്ററുകൾ തീർച്ചയായും സജീവമാകണം. ബാഹുബലിയുടെ തമിഴ് പതിപ്പാണ് വ്യക്തിപരമായി ഞാൻ ആസ്വദിച്ചത്. ഈയൊരു പ്രതിസന്ധി ഘട്ടത്തിൽ മലയാളം – തമിഴ് എന്ന വേർതിരിവിൽ ആരും തീയേറ്റർ ജീവനക്കാരെയും അവരുടെ അന്നത്തെയും ബുദ്ധിമുട്ടിക്കരുതെ എന്ന് അഭ്യർത്ഥിക്കുന്നു’. സുരേഷ് ഗോപി കുറിച്ചു.
മലയാളം പതിപ്പ് പുറത്തിറക്കാത്ത സംഭവത്തെ വിശദീകരിച്ച് ചിത്രത്തിന്റെ സൗണ്ട് ഡിസൈനർ ആയ റസൂൽ പൂക്കുട്ടിയും എത്തിയിരുന്നു. സമയക്കുറവിന്റെ സമ്മർദ്ദത്തിൽ ജോലി ചെയ്യേണ്ടി വന്നതുമൂലം സംഭവിച്ച ഒരു പിഴവിൽ നിന്നാണ് ഈ സ്ഥിതിയുണ്ടായതെന്നാണ് റസൂൽ പൂക്കുട്ടി പറഞ്ഞത്. പ്രശ്നം പരിഹരിച്ചുവെന്നും പ്രിന്റുകൾ വൈകാതെ തീയേറ്ററുകളിൽ എത്തുമെന്നും റസൂൽ പൂക്കുട്ടി വ്യക്തമാക്കി.
റസൂൽ പൂക്കുട്ടിയുടെ വാക്കുൾ ഇങ്ങനെ ‘സമയത്തിൻറേതായ സമ്മർദ്ദം ഉണ്ടായിരുന്നതിനാൽ പ്രിൻറിന് അയക്കുന്നതിനു മുൻപ് മിക്സിന്റെ ക്വാളിറ്റി കൺട്രോൾ നടത്താൻ ഞങ്ങൾക്ക് സമയം കിട്ടിയില്ല. സിസ്റ്റത്തിലെ ഒരു ബഗ് കാരണം അത് സിങ്ക് പ്രശ്നങ്ങളിലേക്കും മറ്റു ചില ഓഡിയോ പ്രശ്നങ്ങളിലേക്കും നയിച്ചു. അതിനാലാണ് മലയാളം പതിപ്പ് വൈകിയത്. പ്രശ്നം ഞങ്ങൾ പരിഹരിച്ചു. പ്രിൻറുകൾ വൈകാതെ എത്തും.
മിക്സ് ഫയൽസ് ഉണ്ടാക്കാനായി പുതിയതും വേഗമുള്ളതുമായ ഒരു രീതിയാണ് ഞങ്ങൾ അവലംബിച്ചിരുന്നത്. ഞങ്ങളുടെ പരീക്ഷണഫലങ്ങളൊക്കെ മികച്ചതുമായിരുന്നു. പക്ഷേ സോഫ്റ്റ്വെയറിലെ ഒരു ബഗ് മൂലം ഫൈനൽ പ്രിൻറിൽ പ്രശ്നം കണ്ടെത്തുകയായിരുന്നു. അല്ലു അർജുന്റെയും രശ്മിക മന്ദാനയുടെയും ആരാധകർക്ക് സിങ്ക് ആവാത്ത ഒരു പ്രിൻറ് നൽകരുതെന്ന് ഞാൻ കരുതി. കാരണം അവർ മികച്ചത് അർഹിക്കുന്നുണ്ട്’.
Comments