ബാഗ്ദാദ് : ഇറാഖിൽ റോക്കറ്റ് ആക്രമണം. ബാഗ്ദാദിലെ ഗ്രീൻ സോണിൽ രണ്ട് റോക്കറ്റുകൾ പതിച്ചു. സംഭവത്തിൽ ആളപായം റിപ്പോർട്ട് ചെയ്തിട്ടില്ല.
പുലർച്ചെയോടെയായിരുന്നു ആക്രമണം ഉണ്ടായതെന്നാണ് റിപ്പോർട്ടുകൾ. ഗ്രീൻ സോണിലെ അമേരിക്കൻ എംബസിയ്ക്ക് സമീപമായിരുന്നു റോക്കറ്റുകൾ പതിച്ചത്. സംഭവത്തിൽ രണ്ട് കാറുകൾ തകർന്നു. ഒരു റോക്കറ്റ് അന്തരീക്ഷത്തിൽവെച്ചു സി-റാം പ്രതിരോധ സംവിധാനം ഉപയോഗിച്ച് നിർവ്വീര്യമാക്കിയതായി അധികൃതർ അറിയിച്ചു. സംഭവത്തിൽ ഇറാഖ് സൈന്യം അന്വേഷണം പ്രഖ്യാപിച്ചിട്ടുണ്ട്.
ഇറാനാണ് ആക്രമണത്തിന് പിന്നിൽ എന്നാണ് സൂചന. അമേരിക്കൻ എംബസിയ്ക്ക് പുറമേ സർക്കാർ കെട്ടിടങ്ങളും ഗ്രീൻ സോണിൽ സ്ഥിതിചെയ്യുന്നുണ്ട്. ഈ മേഖലയിൽ ഉണ്ടായ ആക്രമണത്തെ വലിയ ഗൗരവത്തോടെയാണ് അധികൃതർ കാണുന്നത്.
