കൊച്ചി : പുരാവസ്തു തട്ടിപ്പ് വീരൻ മോൻസൻ മാവുങ്കലിനെതിരായ കള്ളപ്പണം വെളുപ്പിക്കൽ കേസിൽ സിനിമാ- സീരിയൽ താരം ശ്രുതി ലക്ഷ്മിയെ എൻഫോഴ്സ്മെന്റ് ചോദ്യം ചെയ്യുന്നു. കൊച്ചിയിലെ എൻഫോഴ്സ്മെന്റ് ആസ്ഥാനത്ത് വെച്ചാണ് ചോദ്യം ചെയ്യുന്നത്. അന്വേഷണത്തിൽ ശ്രുതിയും മോൻസൻ മാവുങ്കലുമായി സാമ്പത്തിക ഇടപാട് നടന്നതായി എൻഫോഴ്സ്മെന്റ് കണ്ടെത്തിയിട്ടുണ്ട്. ഇതിന്റെ അടിസ്ഥാനത്തിലാണ് ചോദ്യം ചെയ്യൽ.
ഉച്ചയോടെയാണ് ശ്രുതിയെ ചോദ്യം ചെയ്യാൻ വിളിപ്പിച്ചത്. മോൻസൻ മാവുങ്കലുമായി നടത്തിയ സാമ്പത്തിക ഇടപാടുകളെക്കുറിച്ചാണ് എൻഫോഴ്സ്മെന്റ് പ്രധാനമായും വിവരങ്ങൾ ആരായുന്നത് മോൻസന്റെ അക്കൗണ്ടിൽ നിന്നും ശ്രുതിയുടെ അക്കൗണ്ടിലേക്ക് പണം എത്തിയതായി എൻഫോഴ്സ്മെന്റിന് പ്രാഥമിക പരിശോധനയിൽ വ്യക്തമായിട്ടുണ്ട്. ഇതുമായി ബന്ധപ്പെട്ട കൂടുതൽ വിവരങ്ങൾക്കാണ് നടിയെ അന്വേഷണ സംഘം വിളിച്ചുവരുത്തിയത്. പുരാവസ്തു ഇടപാടുകൾ നടന്നിട്ടുണ്ടോയെന്ന കാര്യവും അന്വേഷണ സംഘം പരിശോധിക്കുന്നുണ്ട്. മോൻസന്റെ ജന്മദിനത്തിൽ സംഘടിപ്പിച്ച നൃത്ത പരിപാടിയിൽ ശ്രുതി ലക്ഷ്മി പങ്കെടുത്തത് വലിയ ചർച്ചയായിരുന്നു.
അതേസമയം താൻ ഒരു ക്ലാസിക്കൽ ഡാൻസർ ആണെന്നും അതിനാലാണ് പരിപാടിയ്ക്കായി മോൻസന്റെ വീട്ടിൽ എത്തിയതെന്നുമായിരുന്നു നടിയുടെ പ്രതികരണം. മുടികൊഴിച്ചിലിനും മോൻസന്റെ പക്കൽ ചികിത്സ തേടിയിരുന്നു. മറ്റ് ഇടപാടുകൾ ഇല്ലെന്നും ശ്രുതി ലക്ഷ്മി വ്യക്തമാക്കിയിരുന്നു.
