എറണാകുളം : അഞ്ച് ദിവസത്തെ സന്ദർശനത്തിനായി കേരളത്തിൽ എത്തിയ ഉപരാഷ്ട്രപതി വെങ്കയ്യനായിഡുവിന് ഊഷ്മള സ്വീകരണം. കൊച്ചി നാവിക സേനാ വിമാനത്താവളത്തിൽ എത്തിയ അദ്ദേഹത്തെ വ്യവസായ വകുപ്പ് മന്ത്രി പി.രാജീവ്, മേയർ അഡ്വ.എം.അനിൽകുമാർ, കെ.ജെ മാക്സി എംഎൽഎ, റിയർ അഡ്മിറൽ ആന്റണി ജോർജ്, സിറ്റി പോലീസ് കമ്മീഷണർ സി. നാഗരാജു, ജില്ലാ കളക്ടർ ജാഫർ മാലിക്, അഡീഷണർ സ്റ്റേറ്റ് പ്രോട്ടോക്കോൾ ഓഫീസർ എം.എസ് ഹരികൃഷ്ണൻ എന്നിവർ ചേർന്ന് സ്വീകരിച്ചു. ചെന്നൈയിൽ നിന്നും പ്രത്യേക വിമാനത്തിൽ രാവിലെ 10 മണിയോടെയായിരുന്നു അദ്ദേഹം കൊച്ചിയിൽ എത്തിയത്.
ഉപരാഷ്ട്രപതിക്കൊപ്പം ഭാര്യ ഉഷയും കുടുംബാംഗങ്ങളും ഉണ്ട്. 10.45 ന് വ്യോമസേനയുടെ മറ്റൊരു വിമാനത്തിൽ അദ്ദേഹം ലക്ഷദ്വീപിലേക്ക് പോയി. ഞായറാഴ്ച രാവിലെ ഉപരാഷ്ട്രപതി കൊച്ചിയിൽ തിരിച്ചെത്തും.ശനിയാഴ്ച കടമത്ത് ദ്വീപിലെ ആർട്സ് ആന്റ് സയൻസ് കോളേജിൽ സംഘടിപ്പിക്കുന്ന പരിപാടിയിൽ അദ്ദേഹം പങ്കെടുക്കും. കടമത്ത്, ആന്ത്രോത്ത് എന്നീ ദ്വീപുകളിലെ ആർട്സ് ആന്റ് സയൻസ് കോളേജുകളുടെ ഉദ്ഘാടനവും അദ്ദേഹം നിർവ്വഹിക്കും
ഞായറാഴ്ച കേരളത്തിൽ തിരിച്ചെത്തുന്ന അദ്ദേഹം തദ്ദേശീയമായി നിർമ്മിച്ച വിമാന വാഹിനികപ്പലായ ഐഎൻഎസ് വിക്രാന്ത് സന്ദർശിക്കും. പിന്നീടുള്ള ദിവസങ്ങളിൽ കൊച്ചിയിലും കോട്ടയത്തും വിവിധ പരിപാടികളിൽ പങ്കെടുക്കും. ശേഷം ചൊവ്വാഴ്ച നാലിന് രാവിലെ വ്യോമസേന വിമാനത്തിൽ അദ്ദേഹം ഡൽഹിയിലേക്ക് മടങ്ങും.
Comments