ന്യൂഡൽഹി; ഇന്ത്യൻ മെഡിക്കൽ അസോസിയേഷന്റേതുൾപ്പെടെ മൂന്ന് ട്വിറ്റർ അക്കൗണ്ടുകൾ ഹാക്ക് ചെയപ്പെട്ടു. തുടർന്ന് അക്കൗണ്ടുകളുടെ പേര് ‘ഇലോൺ മസ്ക്’ എന്നാക്കി പുനർനാമകരണം ചെയ്ത് ട്വീറ്റുകളും പ്രത്യക്ഷപ്പെടാൻ തുടങ്ങി. ഇന്ത്യൻ മെഡിക്കൽ കൗൺസിൽ ഓഫ് വേൾഡ് അഫയേഴ്സ് (ഐസിഡബ്ല്യൂഎ), മൻ ദേശി മഹിളാ ബാങ്ക് (മൈക്രോ ഫിനാൻസ് ബാങ്ക്) എന്നിവയാണ് ഹാക്ക് ചെയ്യപ്പെട്ട മറ്റ് ട്വിറ്റർ അക്കൗണ്ടുകൾ.
ഒന്നുകിൽ സുരക്ഷിതമല്ലാത്ത ലിങ്കുകൾ തുറന്നതിനാലോ അല്ലെങ്കിൽ പാസ്വേർഡ് പരസ്യമാകപ്പെട്ടതോ ആകാം ഹാക്കറുടെ കൈകളിൽ അക്കൗണ്ടുകൾ എത്താൻ കാരണമെന്നാണ് പ്രാഥമിക നിഗമനം. പ്രധാനമന്ത്രി നരേന്ദരമോദിയുടെ ട്വിറ്റർ അക്കൗണ്ട് ഹാക്ക് ചെയ്യപ്പെട്ട സാഹചര്യത്തിന് സമാനമായ സംഭവങ്ങളാണ് പിന്നീടുണ്ടായത്. ഹാക്ക് ചെയ്യപ്പെട്ട ട്വിറ്ററർ അക്കൗണ്ടുകളിൽ നിന്നും ക്രിപ്റ്റോകറൻസിയുമായി ബന്ധപ്പെട്ട പോസ്റ്റുകൾ ട്വീറ്റ് ചെയ്യാൻ തുടങ്ങി.
ഹാക്ക് ചെയ്യപ്പെട്ടവയിൽ ഐസിഡബ്ല്യൂഎയുടെ അക്കൗണ്ട് മാത്രമാണ് ഇതിനോടകം തിരിച്ചെടുക്കാനായത്. ഐഎംഎയുടെയും മഹിളാ ബാങ്കിന്റെയും അക്കൗണ്ടുകളിൽ വിദ്വേഷപരമായ ട്വീറ്റുകൾ നിലനിൽക്കുകയാണ്.
കഴിഞ്ഞ ഡിസംബർ 12നായിരുന്നു പ്രധാനമന്ത്രി നരേന്ദ്രമോദിയുടെ വ്യക്തിഗത ട്വിറ്റർ അക്കൗണ്ട് ഇത്തരത്തിൽ ഹാക്ക് ചെയ്യപ്പെട്ടത്. തുടർന്ന് ക്രിപ്റ്റോകറൻസിയെ പിന്തുണയ്ക്കുന്ന ട്വീറ്റുകൾ പ്രത്യക്ഷപ്പെടാൻ തുടങ്ങി. എങ്കിലും ഏതാനും മണിക്കൂറുകൾക്കുള്ളിൽ അക്കൗണ്ട് പുനഃസ്ഥാപിക്കാൻ സാങ്കേതിക വിദഗ്ധർക്ക് സാധിച്ചിരുന്നു.
