കോഴിക്കോട് : തൊണ്ടയാട് ബൈപ്പാസിൽ ഒരാളുടെ മരണത്തിന് ഇടയാക്കിയ വാഹനാപകടത്തിന് കാരണം ആയ കാട്ടുപന്നിയെ വെടിവെച്ചിട്ടു. ഫോറസ്റ്റ് ഉദ്യോഗസ്ഥരുടെ നേതൃത്വത്തിലുള്ള സംഘമാണ് ദൗത്യത്തിൽ ഏർപ്പെട്ടത്. ഇന്നലെ പന്നി കുറുകെ ചാടിയതിനെ തുടർന്ന് നിയന്ത്രണം വിട്ട പിക്കപ്പ് വാൻ എതിരേ വന്ന വാനുമായി കൂട്ടിയിടിക്കുകയായിരുന്നു.
വെള്ളിയാഴ്ച രാവിലെയാണ് പന്നിയെ വെടിവെച്ച് കൊന്നത്. മുക്കം സ്വദേശിയായ സിഎം ബാലനായിരുന്നു പന്നിയെ വെടിവെച്ചത്. പന്നിയ്ക്ക് ഏകദേശം ഒരു ക്വിന്റലിൽ അധികം തൂക്കമുണ്ടെന്ന് അധികൃതർ പറഞ്ഞു.
ഇന്നലെ രാവിലെയാണ് തൊണ്ടയാട് ബൈപ്പാസിൽ പന്നി അപകടമുണ്ടാക്കിയത്. സംഭവത്തിൽ ചേളന്നൂർ ഇരുവള്ളൂർ സ്വദേശി സിദ്ദിഖ് ആണ് മരിച്ചത്. അപകടത്തിൽ മൂന്ന് പേർക്ക് പരിക്കേൽക്കുകയും ചെയ്തിരുന്നു. കക്കോടി സ്വദേശി പ്രമോദ്, ഇരുവള്ളൂർ സ്വദേശി മീത്തൽ സന്നാഫ്, മോരിക്കര സ്വദേശി അനൂപ് എന്നിവർക്കാണ് പരിക്കേറ്റത്. ഇടിയുടെ ആഘാതത്തിൽ വാഹനം പൂർണമായും തകർന്നിരുന്നു.
Comments