മുംബൈ: ഗോഡ്സെ കേന്ദ്രകഥാപാത്രമായ ‘ഞാന് എന്തിന് ഗോഡ്സെയെ കൊന്നു'(why I killed Gandhi) എന്ന സിനിമ നിരോധിക്കണമെന്ന് മഹാരാഷ്ട്ര മുഖ്യമന്ത്രി ഉദ്ധവ്താക്കറെയോട് ആവശ്യപ്പെടുമെന്ന് കോണ്ഗ്രസ് സംസ്ഥാന അധ്യക്ഷന് നാനാ പട്ടോലെ. എന്തുകൊണ്ട് താന് ഗാന്ധിയെ കൊന്നു എന്ന നാഥുറാം വിനായക് ഗോഡ്സെ, കോടതിയില് സമര്പ്പിച്ച മൊഴിയെ അടിസ്ഥാനമാക്കി തയ്യാറാക്കിയ സിനിമ തുടക്കം മുതല് തന്നെ വിവാദമായിരുന്നു.
മഹാത്മാഗാന്ധിയുടെ ഘാതകന് ഹീറോപരിവേഷം നല്കുന്നുണ്ടെങ്കില് അംഗീകരിക്കാനാവില്ലെന്നും ഇന്ത്യയുടെ ആഗോളപ്രശസ്തിക്കുകാരണം ഗാന്ധിയും അദ്ദേഹത്തിന്റെ അഹിം സാസിദ്ധാന്തവുമാണെന്നും അദ്ദേഹം പറഞ്ഞു. കോണ്ഗ്രസ് സിനിമ പുറത്തിറക്കുന്നതിന് എതിരാണെന്നും മഹാരാഷ്ട്രയില് സിനിമ നിരോധിക്കണം എന്ന് ആവശ്യപ്പെട്ട് മുഖ്യമന്ത്രി ഉദ്ധവ് താക്കറെയെ സമീപിക്കുമെന്നും അദ്ദേഹം പറഞ്ഞു.
നാഥുറാം ഗോഡ്സെയെ മഹത്വവല്ക്കരിക്കുന്നു എന്ന ആരോപണമുന്നയിച്ച് രാജ്യവ്യാപകമായി സിനിമ നിരോധിക്കണമെന്ന് ആവശ്യപ്പെട്ട് ഓള് ഇന്ത്യ സിനി വര്ക്കേഴ്സ് അസോസിയേഷന് പ്രധാനമന്ത്രിക്ക് കത്തെഴുതിയിട്ടുണ്ട്. രാജ്യത്തിനകത്തും പുറത്തും ആരാധ്യനാണ് ഗാന്ധിജിയെന്നും ഓരോ ഇന്ത്യക്കാരനും ഗാന്ധിജിയുടെ ആശയം സ്നേഹത്തിന്റെയും ത്യാഗത്തിന്റെയും പ്രതീകമായിക്കാണുന്നുവെന്നും കത്തില് പറയുന്നു.
നാഥുറാംവിനായക് ഗോഡ്സെ ഈ രാജ്യത്തെ ഒരാളുടെയും ഒരിഞ്ച് ബഹുമാനത്തിനും അര്ഹനല്ല. സിറ്റിങ് എംപിയും മറാത്തി നടനുമായ അമോല് കോഹ്ലെയാണ് നാഥുറാംഗോഡ്സെ ആയി അഭിനയിക്കുന്നത്. ഇതിനെതിരെ പാര്ട്ടിയിലെ മുതിര്ന്ന് നേതാക്കളും രാഷ്ട്രീയ എതിരാളികളും വിമര്ശനവുമായി രംഗത്തെത്തിയിട്ടുണ്ട്. സിനിമയുടെ ട്രെയിലര് പുറത്തിറങ്ങിയതോടെയാണ് വിവാദം കത്തിപ്പടര്ന്നത്. കോഹ്ളെ ഗാന്ധിവധത്തെ ന്യായികരിക്കുന്ന സിനിമാരംഗം നവമധ്യമത്തില് വൈറലായതോടെയാണ് കോണ്ഗ്രസ് രംഗത്ത് എത്തിയത്. ഗാന്ധിയന് ചിന്തകളുടെ ഉറച്ചവിശ്വാസിയായ താന് ഒരു അഭിനേതാവ് എന്ന നിലയിലാണ് ഈ റോള് കൈകാര്യം ചെയ്യുന്നത് എന്നാണ് ഇതുസംബന്ധിച്ച കോഹ്ലെയുടെ നിലപാട്. താന് ഗോഡ്സെയുടെ ആശയത്തെ പിന്തുണയ്ക്കുന്നില്ലെന്നും അദ്ദേഹം പറഞ്ഞു. ഷിരൂര് ലോക്സഭമണ്ഡലത്തില് നി്ന്നുള്ള എംപി ആയ കോഹ്ലെ ഛത്രപതി ശിവജി പരമ്പരയിലൂടെയാണ് പ്രശസ്തനായത്. ജനുവരി 30ന് രക്തസാക്ഷി ദിനമായി ആചരിക്കുന്ന ഗാന്ധിജിയുടെ ചരമത്തിലാണ് സിനിമ പ്രദര്ശനത്തിന് എത്തുന്നത്.
Comments