തിരുവനന്തപുരം: മേപ്പടിയാന്റെ വ്യാജ പതിപ്പ് ടെലഗ്രാം അടക്കമുള്ള സോഷ്യൽ മീഡിയയിൽ പ്രചരിപ്പിച്ച യുവാവിനെതിരെ പോലീസിൽ പരാതി. മലപ്പുറം സ്വദേശിയായ ജസീം കെവിഎം എന്ന യുവാവിനെതിരെയാണ് മേപ്പടിയാന്റെ അണിയറ പ്രവർത്തകർ പരാതി നൽകിയിരിക്കുന്നത്. വ്യാജ പതിപ്പ് വിതരണം ചെയ്തതിനൊപ്പം സോഷ്യൽ മീഡിയയിൽ യുവാവ് വെല്ലുവിളിക്കുകയും ചെയ്തു. വിഷ്ണു മോഹൻ സംവിധാനം ചെയ്ത ഉണ്ണി മുകുന്ദൻ ചിത്രമാണ് മേപ്പടിയാൻ.
ഉണ്ണി മുകുന്ദന്റെ നിർമ്മാണ കമ്പനിയായ യുഎംഎഫ് പ്രൈവറ്റ് ലിമിറ്റഡ്, ഒറ്റപ്പാലം സർക്കിൾ ഇൻസ്പെക്ടർക്ക് പരാതി നൽകി. ‘അവർക്ക് പറ്റുമെങ്കിൽ തന്നെ പിടിക്കാൻ പറ’ എന്നടക്കം ഇയാൾ സോഷ്യൽ മീഡിയയിൽ വെല്ലുവിളിച്ചിട്ടുണ്ട്. അതേസമയം കഴിഞ്ഞ ദിവസം ചിത്രത്തിന്റെ വ്യാജ പതിപ്പ് സോഷ്യൽ മീഡിയയിൽ ഇറങ്ങിയതിനെതിരെ ഉണ്ണി മുകുന്ദനും സംവിധായകനും എത്തിയിരുന്നു.
‘വളരെ മികച്ച അഭിപ്രായത്തോട് കൂടി കുടുംബപ്രേക്ഷകർ ഏറ്റെടുത്ത് തിയേറ്ററിൽ മുന്നേറികൊണ്ടിരിക്കുമ്പോൾ കേൾക്കുന്നത് പൈറസി പ്രിന്റ് ഇറങ്ങി പലരും അത് വീട്ടിൽ ഇരുന്നു കാണുന്നു എന്ന്. സിനിമയെ ആത്മാർത്ഥമായി സ്നേഹിച്ച് മുതൽ മുടക്കിയ തന്റേയും വർഷങ്ങളുടെ കാത്തിരിപ്പിന് ശേഷം ആദ്യമായി സംവിധാനം ചെയുന്ന സംവിധായകൻ വിഷ്ണു മോഹന്റേയും വേദന പറഞ്ഞറിയിക്കാൻ പറ്റില്ലെ’ന്ന് ഉണ്ണി മുകുന്ദൻ ഫേസ്ബുക്കിൽ കുറിച്ചിരുന്നു.
‘കൊറോണ ബാധിച്ച് തിയേറ്ററിൽ വരാൻ പറ്റാത്തവർ ഉണ്ടാകും. എന്നിരുന്നാലും മോറൽ എത്തിക്സ് വെച്ചിട്ട് തിയേറ്ററിൽ ഓടിക്കൊണ്ടിരിക്കുന്ന സിനിമ വീട്ടിൽ ഇരുന്നു വ്യാജ പതിപ്പ് കാണുന്ന പ്രവണത നല്ലതല്ലെന്ന് അറിയാമല്ലോ? എത്രെയോ പേരുടെ അദ്ധ്വാനം ആണ് സിനിമ എന്നും 50% മാത്രം സീറ്റിങ് പരിധിയിൽ ആണ് ഇപ്പോൾ തിയേറ്ററിൽ ഓടുന്നതാന്നെന്നും ഓർക്കണം. ഒരുപാട് മുതൽമുടക്കിൽ എടുക്കുന്ന സിനിമ പോലെ തന്നെയാണ് നമ്മുടെ സിനിമയുമെന്ന്’ ഉണ്ണി മുകുന്ദൻ പറഞ്ഞിരുന്നു.
