തിരുവനന്തപുരം : സംസ്ഥാനത്ത് ഒന്ന് മുതൽ ഒൻപത് വരെയുള്ള ക്ലാസുകളിലെ വിദ്യാർത്ഥികൾക്ക് വേണ്ടി ഓൺലൈൻ ക്ലാസുകൾ ശക്തമാക്കുമെന്ന് വിദ്യാഭ്യാസ മന്ത്രി വി ശിവൻകുട്ടി. 10,11, 12 ക്ലാസുകൾ ഓഫ്‌ലൈനായി തന്നെ നടപ്പിലാക്കും. ഇവർക്ക് ഓൺലൈൻ ക്ലാസുകൾ സജ്ജമാണെന്നും സാഹചര്യത്തിനനുസരിച്ച് തീരുമാനമെടുക്കുമെന്നും മന്ത്രി പറഞ്ഞു.
എട്ട്, ഒൻപത് ക്ലാസുകളിലെ കുട്ടികൾ ജിസ്യൂട്ട് സംവിധാനം വഴിയായിരിക്കും ഓൺലൈൻ ക്ലാസ്. ഓൺലൈൻ ക്ലാസിൽ ഹാജർ നിർബന്ധമായും രേഖപ്പെടുത്തും. ഒന്ന് മുതൽ ഏഴ് വരെയുള്ള വിദ്യാർത്ഥികൾക്ക് വിക്ടേഴ്‌സ് ചാനൽ വഴി ക്ലാസെടുക്കും.
10,11,12 ക്ലാസുകളിലെ പാഠഭാഗങ്ങൾ പരീക്ഷയ്‌ക്കു മുൻപ് തന്നെ പൂർത്തിയാക്കും. അതിനനുസരിച്ച് പുതിയ ക്ലാസ് ടൈംടേബിൾ തയാറാക്കും. ഹയർസെക്കൻഡറി ഇംപ്രൂവ്‌മെന്റ് പരീക്ഷ ഈ മാസം 29 ന് തന്നെ തുടങ്ങും. അതിനുവേണ്ട എല്ലാ സജ്ജീകരണങ്ങളും പൂർത്തിയായിക്കഴിഞ്ഞു. ചോദ്യപേപ്പറുകൾ അതാതു പരീക്ഷാകേന്ദ്രങ്ങളിൽ എത്തിച്ചുകൊണ്ടിരിക്കുകയാണ്. പരീക്ഷയ്‌ക്ക് കൊറോണ പോസിറ്റീവ് ആയ കുട്ടികൾക്ക് പ്രത്യേക മുറിസജ്ജമാക്കുമെന്നും മന്ത്രി വ്യക്തമാക്കി.
എസ്എസ്എൽസി, ഹയർസെക്കൻഡറി പ്രാക്ടിക്കൽ പരീക്ഷകൾ ആദ്യം നടത്താനുള്ള തീരുമാനം മാറ്റി. എഴുത്തുപരീക്ഷകൾ നടത്തിയ ശേഷമാകും പ്രാക്ടിക്കൽ പരീക്ഷ. മോഡൽ പരീക്ഷ നടത്തുന്നത് സ്‌കൂളുകൾക്ക് തീരുമാനിക്കാം. വാർഷിക പരീക്ഷ നടത്തിപ്പിൽ ആശങ്ക വേണ്ടെന്നും എവിടെ നിന്ന് വേണമെങ്കിലും ചോദ്യങ്ങൾ വരാമെന്നും മന്ത്രി അറിയിച്ചു.
