ന്യൂഡല്ഹി: രാജ്യത്തിന് കൂടുതല് വരുമാനം ലക്ഷ്യമിട്ട് കൂടുതല് സാമ്പത്തിക മുന്നേറ്റം ഉണ്ടാക്കാന് സഹായിക്കുന്നതാണ് ഈ വര്ഷത്തെ ബജറ്റെന്ന് സാമ്പത്തിക വിദഗ്ധര്. എല്ഐസി സ്വകാര്യവത്ക്കരണം, 5ജി സ്പെക്ട്രം ലേലം എന്നിവ കൂടുതല് വരുമാനം പ്രതീക്ഷിച്ചുകൊണ്ടാണ് ബജറ്റില് ഉള്പ്പെടുത്തിയിരിക്കുന്നത്. സ്വകാര്യ, പ്രതിരോധ മേഖലയില് കൂടുതല് നിക്ഷേപം കൊണ്ടുവരാനും ബജറ്റ് ലക്ഷ്യമിടുന്നു. പ്രതിരോധ മേഖലയില് കൂടുതല് നിക്ഷേപം പ്രതീക്ഷിക്കുമ്പോഴും തദ്ദേശീയമായ നിര്മ്മാണ പദ്ധതികളാണ് സര്ക്കാര് ലക്ഷ്യമിടുന്നത്. ഇതോടെ കൂടുതല് തൊഴിലവസരങ്ങള് സൃഷ്ടിക്കപ്പെടുമെന്നത് ബജറ്റിന്റെ തിളക്കം വര്ദ്ധിപ്പിക്കുന്നു.
ആത്മനിര്ഭര് ഭാരത് പദ്ധതിയിലൂടെ 60 ലക്ഷത്തിലധികം പേര്ക്ക് തൊഴില് ലഭിക്കുമെന്ന് നിര്മ്മല സീതാരാമന് ഇന്ന് പ്രഖ്യാപിച്ചിട്ടുണ്ട്. 14 മേഖലകളിലെ പദ്ധതികളിലൂടെയാണ് 60 ലക്ഷം തൊഴിലവസരങ്ങള് സൃഷ്ടിക്കപ്പെടുക. 30 ലക്ഷം കോടിയുടെ അധിക ഉത്പാദനത്തിനാണ് വഴിയൊരുങ്ങുന്നത്. അടുത്ത അഞ്ച് വര്ഷത്തിനുള്ളില് ടെക്സ്റ്റൈല് മേഖലയില് 19,000 കോടി രൂപയുടെ പുതിയ നിക്ഷേപത്തിന് ഈ പദ്ധതി വഴി വയ്ക്കുമെന്ന് സാമ്പത്തിക സര്വ്വേ കണക്കാക്കുന്നു. മൂന്ന് ലക്ഷം കോടി രൂപയിലധികം വിറ്റുവരവ് സൃഷ്ടിക്കുമെന്നും, ഈ മേഖലയില് 7.5 ലക്ഷം അധിക തൊഴിലവസരങ്ങള് സൃഷ്ടിക്കപ്പെടുമെന്നുമാണ് പ്രതീക്ഷിക്കുന്നത്. നാല് സ്ഥലങ്ങളില് ലോജിസ്റ്റിക് പാര്ക്കുകള് നിര്മ്മിക്കുമെന്നും ധനമന്ത്രി വ്യക്തമാക്കിയിട്ടുണ്ട്.
തൊഴിലുറപ്പ് പദ്ധതികള്ക്ക് വേണ്ടിയും കൂടുതല് തുക നല്കും. ചെറുകിട ഇടത്തരം മേഖലകള്ക്കായി രണ്ട് ലക്ഷം കോടിയാണ് വകയിരുത്തുന്നത്. ഇങ്ങനെ സാധാരണക്കാര്ക്ക് പൂര്ണമായും പിന്തുണയും സാമ്പത്തിക സഹായവും നല്കിക്കൊണ്ടുള്ള പ്രഖ്യാപനങ്ങളാണ് ബജറ്റില് ഉള്്ക്കൊള്ളിച്ചിരിക്കുന്നത്. കൂടുതല് തൊഴിലവസരങ്ങള് സൃഷ്ടിക്കപ്പെടുന്നത് വഴി, ഓരോ വ്യക്തിയ്ക്കും സ്വന്തമായി സാമ്പത്തിക അടിത്തറ ഉണ്ടാക്കാനും ഇത് സഹായമാകുമെന്നാണ് വിദഗ്ധര് ചൂണ്ടിക്കാണിക്കുന്നത്.
