മുംബൈ: ഇന്ത്യയുടെ വാനമ്പാടി ലതാ മങ്കേഷ്കറിന് മുംബൈയിലെ ശിവാജി പാര്ക്കില് സ്മാരകം സ്ഥാപിക്കണമെന്ന ആവശ്യവുമായി ബിജെപി. ലതാ മങ്കേഷ്കറിന്റെ ഭൗതികദേഹം ഇവിടെയാണ് സംസ്കരിച്ചത്. മഹാരാഷ്ട്ര മുഖ്യമന്ത്രി ഉദ്ധവ് താക്കറെയ്ക്കാണ് ബിജെപി നിയമസഭാംഗം രാം കദം ഈ ആവശ്യമുന്നയിച്ച് കത്തയച്ചിരിക്കുന്നത്. ലതാ ദീദിയ്ക്ക് ശിവാജി പാര്ക്കില് തന്നെ ഒരു സ്മാരകം ഒരുക്കുന്നതാണ് അവര്ക്ക് ഉചിതമായ ആദരാഞ്ജലി. ലോകാമെമ്പാടും ലതാ ദീദിയ്ക്കുള്ള ആരാധകര്ക്ക് ആദരാഞ്ജലി അര്പ്പിക്കാനും, അവരെ ഓര്മ്മിക്കാനുമുള്ള ഏറ്റവും മികച്ച ഇടമായി ഇത് മാറുമെന്നും കത്തില് പറയുന്നു.
ലതാദീദി ലോകത്തിന്റെത് മുഴുവനാണെന്നും മഹാരാഷ്ട്ര സര്ക്കാരും കേന്ദ്രവും ഈ ആവശ്യം പരിഗണിക്കുമെന്നും ശിവസേന മുഖ്യ വക്താവും പാര്ലമെന്റ് അംഗവുമായ സഞ്ജയ് റാവത്ത് പറഞ്ഞു. സംസ്ഥാനത്ത് തന്നെ ഈ സ്മാരകം ഉയരുമെന്നും അദ്ദേഹം വ്യക്തമാക്കി. ലതാ മങ്കേഷ്കറുടെ സ്മരണയ്ക്കായി ജന്മസ്ഥലമായ ഇന്ഡോറില് മ്യൂസിക് അക്കാദമിയും മ്യൂസിയവും നിര്മ്മിക്കാനുള്ള പദ്ധതി മദ്ധ്യപ്രദേശ് സര്ക്കാരും പ്രഖ്യാപിച്ചിട്ടുണ്ട്. 1929 സെപ്തംബര് 28-ന് ഇന്ഡോറിലാണ് ലതാ മങ്കേഷ്കറുടെ ജനനം. ഇവിടെ ലതാ മങ്കേഷ്കറിന്റെ പ്രതിമയും സ്ഥാപിക്കും. ഇതിന് പുറമെ അവരുടെ ജന്മദിനത്തില് സംസ്ഥാന സര്ക്കാര് ഗായകര്ക്കുള്ള അവാര്ഡ് വിതരണവും നടത്തുമെന്നും സര്ക്കാര് പ്രഖ്യാപിച്ചിട്ടുണ്ട്.
അതേസമയം ലതാ മങ്കേഷ്കറിന്റെ ചിതാഭസ്മം അനന്തരവന് ആദിനാഥ് ശിവാജി പാര്ക്കില് നിന്നും കഴിഞ്ഞ ദിവസം ഏറ്റുവാങ്ങി. ലതയുടെ സഹോദരനും സംഗീതസംവിധായകനുമായ ഹൃദയനാഥ് മങ്കേഷ്കറുടെ മകനാണ് ആദിനാഥ്.ചിതാഭസ്മം കാശിയില് ഗംഗാനദിയില് നിമഞ്ജനം ചെയ്യാനാണ് കുടുംബാംഗങ്ങള് പദ്ധതി ഇടുന്നതെന്നാണ് വിവരം. ഉത്തര്പ്രദേശ് മുഖ്യമന്ത്രി യോഗി ആദിത്യനാഥും ഇവിടെയെത്തി ആദരാഞ്ജലികള് അര്പ്പിക്കും.
Comments