പൊതുജനങ്ങളോട് മോശമായി പെരുമാറിയ 45 പോലീസ് ഉദ്യോഗസ്ഥർക്കെതിരെ നടപടിയെടുത്തെന്ന് മുഖ്യമന്ത്രി; മാന്യമായി പെരുമാറാത്ത ഉദ്യോഗസ്ഥർക്കെതിരെ കർശന നടപടി

തിരുവനന്തപുരം: പൊതുജനങ്ങളോട് മോശമായി പെരുമാറിയ 45 പോലീസ് ഉദ്യോഗസ്ഥർക്കെതിരെ നടപടിയെടുത്തെന്ന് മുഖ്യമന്ത്രി. നിയമസഭയിൽ രേഖാമൂലം നൽകിയ മറുപടിയിലാണ് ഇക്കാര്യം വ്യക്തമാക്കിയത്. പോലീസ് സ്റ്റേഷനുകളിലെത്തുന്ന പൊതുജനങ്ങളോട് മാന്യമായി പെരുമാറാത്ത ഉദ്യോഗസ്ഥർക്കെതിരെ കർശന നടപടി സ്വീകരിക്കുമെന്നും മുഖ്യമന്ത്രി പറഞ്ഞു.

സംസ്ഥാനത്ത് പോലീസുമായി ബന്ധപ്പെട്ട പരാതികൾ വർദ്ധിച്ച് വരുന്നതിനിടെയാണ് മോശം പെരുമാറ്റത്തിന് 45 ഉദ്യോഗസ്ഥർക്കെതിരെ നടപടിയെടുത്തെന്ന് മുഖ്യമന്ത്രി വ്യക്തമാക്കിയത്. പൊതുജനങ്ങളോട് മാന്യമായി പെരുമാറാത്ത ഉദ്യോഗസ്ഥർക്കെതിരെ കർശന നടപടിയെടുക്കാൻ നിർദേശം നൽകിയിട്ടുണ്ട്.

പോലീസ് സ്റ്റേഷനുകളിലെത്തുന്ന പൊതുജനങ്ങളോട് മാന്യമായാണ് ഉദ്യോഗസ്ഥർ പെരുമാറുന്നതെന്നും മുഖ്യമന്ത്രി നിയമസഭയിൽ രേഖാമൂലം മറുപടി നൽകി. സംസ്ഥാനത്ത് മതസൗഹാർദ്ദം തകർക്കുന്ന സംഭവങ്ങൾ വർദ്ധിച്ച് വരുന്നത് ശ്രദ്ധയിൽ പെട്ടിട്ടില്ലെന്നും മുഖ്യമന്ത്രി അറിയിച്ചു.

ഇതുമായി ബന്ധപ്പെട്ട് ഇൻറലിജൻസ് വിവരങ്ങൾ ശേഖരിച്ച് കൃത്യമായി ഇടപെടൽ നടത്തുന്നുവെന്നാണ് നിയമസഭയെ മുഖ്യമന്ത്രി അറിയിച്ചത്. പെൻഷൻ പ്രായം ഏകീകരിക്കുന്ന കാര്യം നിലവിൽ സർക്കാരിന്റെ പരിഗണനയിൽ ഇല്ലെന്നും മുഖ്യമന്ത്രി വ്യക്തമാക്കി.