മുംബൈ : കള്ളപ്പണം വെളുപ്പിക്കൽ കേസുമായി ബന്ധപ്പെട്ട് മന്ത്രി നവാബ് മാലിക്ക് അറസ്റ്റിൽ. വിശദമായ ചോദ്യം ചെയ്യലിന് ശേഷം ഉച്ചയോടെ എൻഫോഴ്‌സ്‌മെന്റാണ് അറസ്റ്റ് രേഖപ്പെടുത്തിയത്. താൻ വിജയിക്കുമെന്നും, ഒരു കാരണവശാലും തലകുനിയ്‌ക്കില്ലെന്നും അറസ്റ്റിന് ശേഷം നവാബ് മാലിക്ക് പ്രതികരിച്ചു.
അധോലോക നായകൻ ദാവൂദ് ഇബ്രാഹിമിനെതിരെ രജിസ്റ്റർ ചെയ്ത കേസുമായി ബന്ധപ്പെട്ടാണ് നവാബ് മാലിക്കിന്റെ അറസ്റ്റ് രേഖപ്പെടുത്തിയത്. നവാബ് മാലിക്കിനെ രാവിലെ ഏഴ് മണിയോടെ എൻഫോഴ്‌സ്‌മെന്റ് കസ്റ്റഡിയിൽ എടുത്തിരുന്നു. തുടർന്ന് നടത്തിയ ചോദ്യം ചെയ്യലിന് ശേഷമാണ് അറസ്റ്റ്.
ദാവൂദ് ഇബ്രാഹിം, സഹായികളായ ചോട്ടാ ഷക്കീൽ, പർക്കർ, ഇക്ബാൽ മിർച്ചി എന്നിവർക്കെതിരെയാണ് കള്ളപ്പണം വെളുപ്പിച്ചതിന് കേസ് എടുത്തിരിക്കുന്നത്. ഇതേ തുടർന്ന് നടത്തിയ രഹസ്യ അന്വേഷണത്തിൽ നവാബ് മാലിക്കിനും പങ്കുള്ളതായി കണ്ടെത്തുകയായിരുന്നു. ഇതേ തുടർന്നാണ് എൻഫോഴ്‌സ്‌മെന്റ് കസ്റ്റഡിയിൽ എടുത്ത് അറസ്റ്റ് രേഖപ്പെടുത്തിയത്.
Comments