ജയ്പൂർ: യാത്രയ്ക്കിടെ പ്രിയപ്പെട്ട ലഘു ഭക്ഷണം കഴിക്കാനുള്ള ആഗ്രഹം എപ്പോഴെങ്കിലും തോന്നിയിട്ടുണ്ടോ? അത്തരത്തിലൊരു അനുഭവം ഇല്ലാത്തതായി ആരും ഉണ്ടാകില്ല. ബസ്സിലോ ട്രെയിനിലോ ആണ് യാത്ര ചെയ്യുന്നതെങ്കിൽ ഇഷ്ടഭക്ഷണം കഴിക്കാനായി ആ യാത്ര കഴിയുന്നത് വരെ കാത്തിരിക്കേണ്ടി വരും. എന്നാലിപ്പോൾ ഇഷ്ടഭക്ഷണം കഴിച്ചതിന്റെ പേരിൽ സസ്പെൻഷനിലായിരിക്കുകയാണ് കുറച്ച് ഉദ്യോഗസ്ഥർ. ട്രെയിനിലെ ലോക്കോ പൈലറ്റും സംഘവുമാണ് സസ്പെൻഷനിലായിരിക്കുന്നത്.
രാജസ്ഥാനിലെ അൽവാർ ജില്ലയിലാണ് സംഭവം നടക്കുന്നത്. ഭക്ഷണ സാധനം വാങ്ങിക്കാനായി സ്റ്റോപ്പ് ഇല്ലാത്തിടത്ത് നിർത്തിയതിനാണ് ലോക്കോ പൈലറ്റും സംഘവും സസ്പെൻഷനിലായിരിക്കുന്നത്. ഒരു പാക്കറ്റ് കച്ചോരി( ലഘുഭക്ഷണം) വാങ്ങുന്നതിനായി ട്രെയിൻ അൽവാറിലെ ക്രോസിംഗിൽ നിർത്തുകയായിരുന്നു. ഇതിന്റെ വീഡിയോ സോഷ്യൽ മീഡിയയിൽ വ്യാപകമായി പ്രചരിച്ചിരുന്നു. പിന്നാലെയാണ് ഉദ്യോഗസ്ഥരെ ഇന്ത്യൻ റെയിൽവേ സസ്പെൻഡ് ചെയ്യുന്നത്.
@AshwiniVaishnaw @RailMinIndia @GMNWRailway @DRMJaipur @drm_dli
यह वीडियो एकwhatsappग्रुप के माध्यम से आज ओर अभी देखने को मिला हैक्या यह रेलवे नियमानुसार सही है अगर गलत है तो एक्शन लीजिए और सम्बंधित सभी व्यक्तियों पर कार्यवाही करें@vishalmrcool @JAGMALSINGH_MON @vasudhoot pic.twitter.com/Tw5dtkozzn
— NARENDRA KUMAR JAIN (@NarendraJainPcw) February 18, 2022
റെയിൽവെ ട്രാക്കിൽ ഒരാൾ പൊതിയുമായി കാത്ത് നിൽക്കുന്നത് വീഡിയോയിൽ കാണാം. പിന്നാലെ ഇയാൾ റെയിൽവേ പാളത്തിലേക്ക് നടക്കുന്നതാണ് കാണുന്നത്. ഇയാളെ കണ്ട് ക്രോസിങ്ങിൽ ട്രെയിൻ നിർത്തുന്നു. ഇയാൾ കൈയിലുള്ള പൊതി ലോക്കോ പൈലറ്റിന്റെ സഹായിക്ക് കൈമാറുന്നു. അതിന് പിന്നാലെ ലോക്കോ പൈലറ്റ് എഞ്ചിന്റെ സൈറൺ മുഴക്കി യാത്ര തുടരുന്നു. അതേസമയം റെയിൽവെ ഗേറ്റിന്റെ മറുവശത്ത് നിരവധി വാഹനങ്ങൾ കാത്തുനിൽക്കുന്നതും കാണാം.
വീഡിയോ സോഷ്യൽ മീഡിയയിൽ വൈറലായിരുന്നു. കുറച്ചുപേർ ലോക്കോ പൈലറ്റിനേയും സംഘത്തേയും പിന്തുണച്ചപ്പോൾ മറ്റുചിലർ സംഭവത്തിലെ നിയമലംഘനത്തേയും ചൂണ്ടിക്കാട്ടി. വീഡിയോ ശ്രദ്ധയിൽപ്പെട്ടതോടെ ജയ്പൂർ ഡിവിഷണൽ റെയിൽവേ മാനേജർ സംഭവത്തെക്കുറിച്ച് അന്വേഷണത്തിന് ഇത്തരവിട്ടു. ലോക്കോ പൈലറ്റ്, അസി. ലോക്കോ പൈലറ്റ്,രണ്ട് ഗേറ്റ് മാൻ, ഒരു സ്റ്റേഷൻ മാസ്റ്റർ എന്നിവരെയാണ് സസ്പെൻഡ് ചെയ്തത്.
