കീവ്: റഷ്യക്കെതിരെ യുദ്ധം ചെയ്യാൻ താൽപര്യമുള്ള വിദേശികളെ ക്ഷണിച്ച് യുക്രെയ്ൻ. യുദ്ധം ചെയ്യാൻ താൽപര്യമുള്ള വിദേശികൾക്ക് അതിനുള്ള അവസരമൊരുക്കുകയാണ് സെലൻസ്കി സർക്കാർ. വിദേശികൾക്ക് വിസയില്ലാതെ രാജ്യത്തെത്താൻ അവസരമൊരുക്കാമെന്നാണ് യുക്രെയ്ൻ പ്രസിഡന്റ് വ്ളോഡിമർ സെലൻസ്കി വ്യക്തമാക്കിയിരിക്കുന്നത്.
റഷ്യൻ അധിനിവേശത്തിലകപ്പെട്ട യുക്രെയ്ന് വേണ്ടി പടക്കളത്തിലേക്കിറങ്ങാൻ സന്നദ്ധരാകുന്ന വിദേശികൾക്ക് പ്രവേശന വിസ വേണ്ടെന്ന് യുക്രെയ്ൻ അറിയിച്ചു. വിസ താൽക്കാലികമായി എടുത്ത് കളയാനുള്ള ഉത്തരവിൽ സെലൻസ്കി ഒപ്പുവെച്ചെന്നാണ് വിവരം.
ഇന്ന് മുതൽ പുതിയ ഉത്തരവ് പ്രാബല്യത്തിൽ വരും. രാജ്യത്തെ സൈനിക നിയമം പിൻവലിക്കുന്നത് വരെ ഉത്തരവ് തുടരുമെന്നാണ് റിപ്പോർട്ട്. യൂറോപ്യൻ യൂണിയനിൽ ചേരുന്നതിനുള്ള അപേക്ഷയിൽ സെലൻസ്കി ഒപ്പ് വെച്ചതിന് പിന്നാലെയാണ് വിസ നടപടി ക്രമങ്ങളിലെ പുതിയ ഭേദഗതി അദ്ദേഹം രാജ്യത്ത് നടപ്പാക്കുന്നത്.
