ലക്നൗ : ഗ്രാമവാസികൾ അറിയാതെ ഗ്രാമപ്രധാൻ വിദേശത്തേക്ക് പോയതിൽ അന്വേഷണത്തിന് ഉത്തരവിട്ട് ഹർദോയ് പഞ്ചായത്ത് ഭരണകൂടം. പഞ്ചായത്ത് രാജ് ഓഫീസർ ഗിരിഷ് ചന്ദ്ര യാണ് ഗ്രമപ്രധാൻ വൈശാലി യാദവിനെതിരെ അന്വേഷണത്തിന് ഉത്തരവിട്ടത്. സംഭവത്തിൽ അന്വേഷണം നടത്തി ഉടൻ റിപ്പോർട്ട് സമർപ്പിക്കാൻ അസിസ്റ്റന്റ് ഡെവലപ്മെന്റ് ഓഫീസർക്ക് നിർദ്ദേശം നൽകിയതായി ഗിരിഷ് ചന്ദ്ര പറഞ്ഞു.
തെര പുർസൗലി ഗ്രാമത്തിലെ ഗ്രാമപ്രധാനായ വൈശാലി പഠിക്കാൻ ആയി യുക്രെയ്നിലേക്ക് പോയതോടെ തന്റെ ചുമതലകളിൽ വീഴ്ചവരുത്തി. സംഭവത്തിൽ റിപ്പോർട്ട് സമർപ്പിക്കാൻ എഡിഒയോട് ആവശ്യപ്പെട്ടിട്ടുണ്ട്. റിപ്പോർട്ടിന്റെ അടിസ്ഥാനത്തിൽ വൈശാലിയ്ക്കെതിരെ നടപടി സ്വീകരിക്കുമെന്നും ഗിരിഷ് ചന്ദ്ര പറഞ്ഞു. മാദ്ധ്യമങ്ങളോട് ആയിരുന്നു അദ്ദേഹത്തിന്റെ പ്രതികരണം.
ആരുമറിയാതെ വൈശാലി വിദേശത്തേക്ക് പോയതിൽ വലിയ പ്രതിഷേധമാണ് ഗ്രാമവാസികളിൽ നിന്നും ഉണ്ടാകുന്നത്. ഈ സാഹചര്യത്തിലാണ് അന്വേഷണത്തിന് ഉത്തരവിട്ടത്. എംബിബിഎസ് പഠിക്കാനായി വൈശാലി യുക്രെയ്നിലേക്ക് പോയ വിവരം നാട്ടുകാർ അറിയുന്നത് അവർ പങ്കുവെച്ച വീഡിയോയിലൂടെയാണ്. രക്ഷാ പ്രവർത്തനങ്ങളിൽ മോദി സർക്കാർ വീഴ്ചവരുത്തുന്നതായി ആരോപിച്ച് വൈശാലി വീഡിയോ പങ്കുവെച്ചിരുന്നു. ഇതോടെയാണ് ഗ്രാമപ്രധാൻ വിദേശത്താണെന്ന് നാട്ടുകാർ അറിഞ്ഞത്.
Comments