മുംബൈ: ഇന്ത്യക്കാർ ഏറ്റവും അധികം ഇഷ്ടപ്പെടുന്ന താര ജോഡികളാണ് അനുഷ്ക ശർമ്മയും വിരാട് കോഹ്ലിയും. ഇരുവരുടെയും ജീവിതത്തിലെ ചെറിയ നിമിഷങ്ങൾ പോലും സമൂഹമാദ്ധ്യമങ്ങളിൽ ചർച്ച ചെയ്യപ്പെടാറുണ്ട്. അനുഷ്ക വന്നതിന് ശേഷമാണ് ജീവിതത്തോടുള്ള കാഴ്ചപ്പാട് തന്നെ മാറിയതെന്നാണ് കിങ് കോഹ്ലി പറയാറുള്ളത്. പൊതുവെ ദേഷ്യക്കാരനായിരുന്ന താൻ അൽപം പക്വത കാണിക്കാൻ ആരംഭിച്ചത് അനുഷ്കയുമായുള്ള വിവാഹശേഷമാണെന്ന് കോഹ്ലി പല അഭിമുഖങ്ങളിലും പറഞ്ഞിട്ടുണ്ട്. അടുത്തിടെ കോഹ്ലിയുടെ മുൻ സഹപ്രവർത്തകൻ പങ്കുവെച്ച രസകരമായ ഒരു സംഭവമാണ് സമൂഹമാദ്ധ്യമങ്ങളിൽ ഇപ്പോൾ ശ്രദ്ധേയമാകുന്നത്.
അണ്ടർ-19 ടീമിൽ കോഹ്ലിയോടൊപ്പം കളിച്ച പ്രദീപ് സാങ്വാനാണ് കൂട്ടുകാരന്റെ സ്വഭാവമാറ്റത്തിന്റെ വിശേഷങ്ങൾ പങ്കുവെച്ചത്. ഒരു പരിപാടിയിൽ വെച്ചാണ് കോഹ്ലിയുടെ വികൃതികൾ കാണുന്നതെന്ന് അദ്ദേഹം പറയുന്നു. ‘വിവാഹശേഷം എങ്ങിനെയാണ് കോഹ്ലി ഇത്രയധികം മാറിയതെന്ന് ഞാൻ ചിന്തിച്ചു. അപ്പോഴാണ് തികച്ചും യാദൃശ്ചികമായി എനിക്ക് ഇതിന് ഉത്തരം ലഭിച്ചത്. അനുഷ്ക കൂടെയുണ്ടായിരുന്നപ്പോൾ തികച്ചും ശാന്തനായി നിന്നിരുന്ന കോഹ്ലി, അനുഷ്ക മാറിയപ്പോൾ തന്നെ പഴയ പോലെ സംസാരിക്കാനും അപക്വമായി പെരുമാറാനും ആരംഭിച്ചു. എന്നാൽ എവിടെ നിന്നോ അനുഷ്കയുടെ നിഴൽ കണ്ടപ്പോൾ അവൻ വീണ്ടും ശാന്തനായി. പിന്നീട് അനുഷ്ക വീണ്ടും എങ്ങോട്ടോ ഒന്ന് മാറിയപ്പോൾ ആ പഴയ കോഹ്ലി പിന്നെയും ഉണർന്നു’ എന്നാണ് പ്രദീപ് പറഞ്ഞത്.
കൗമാരക്കാലത്ത് തന്നെ കോഹ്ലിയുടെ ഉറ്റസുഹൃത്താണ് പ്രദീപ്. ഡൽഹിയിൽ വെച്ച് ഇരുവരും ഒന്നിച്ചായിരുന്നു കളിച്ചിരുന്നത്. അണ്ടർ-19 ടീം അംഗമായിരുന്നു ഇരുവരും.
