കൊറോണയ്ക്ക് ശേഷം തീയേറ്ററുകൾ വീണ്ടും സജീവമാകുമ്പോൾ, ബോക്സ് ഓഫീസിൽ ഏറ്റുമുട്ടുകയാണ് താര രാജാക്കന്മാരും അവരുടെ മക്കളും. മാർച്ച് മൂന്നിന് റിലീസായ മമ്മൂട്ടിയുടെ ‘ഭീഷ്മപർവ്വ’വും, ദുൽഖറിന്റെ ‘ഹേയ് സിനാമിക’യും തീയേറ്ററുകൾ ഇളക്കി മറിക്കുകയാണ്. അച്ഛന്റെയും മകന്റെയും ചിത്രം ആദ്യമായാണ് ഒന്നിച്ച് തീയേറ്ററുകളിൽ എത്തുന്നത്. ഭീഷ്മപർവ്വം കേരളത്തിലെ തീയേറ്ററുകളിൽ നിറഞ്ഞാടുമ്പോൾ, ദുൽഖറിന്റെ ചിത്രം തെന്നിന്ത്യയിൽ മികച്ച പ്രതികരണം നേടിയിരിക്കുകയാണ്.
അതുപോലെ തന്നെ അടുത്തതായി മോഹൻലാലിന്റെ ‘ആറാട്ടും’, മകൻ പ്രണവിന്റെ ‘ഹൃദയ’വും ഒന്നിച്ച് ചില തീയേറ്ററുകളിൽ പ്രദർശിപ്പിക്കുമ്പോൾ, അതൊരു അപൂർവ്വ ഒത്തുചേരലാകുന്നു. താര രാജാക്കന്മാരുടെയും മക്കളുടെയും ചിത്രങ്ങളുടെ ഫ്ളെക്സുകൾ തീയേറ്ററിന് മുന്നിൽ ഒന്നിച്ച് വെച്ചിരിക്കുന്ന ചിത്രങ്ങളാണ് സമൂഹമാദ്ധ്യമങ്ങളിൽ ഇപ്പോൾ വൈറലാകുന്നത്. സംവിധായകൻ രഞ്ജിത്തും ഈ ചിത്രം പങ്കുവെച്ചിട്ടുണ്ട്.
പ്രണവ് മോഹൻലാലിനെ നായകനാക്കി വിനീത് ശ്രീനിവാസൻ സംവിധാനം ചെയ്ത ചിത്രം ജനുവരി 21നാണ് തീയേറ്ററുകളിൽ എത്തിയത്. മോഹൻലാൽ-ബി ഉണ്ണികൃഷ്ണൻ കൂട്ടുകെട്ടിൽ പിറന്ന ആറാട്ട് ഫെബ്രുവരി 18നാണ് റിലീസ് ചെയ്തത്.
Comments