തിരുവനന്തപുരം: സംസ്ഥാന പോലീസ് മേധാവി അനില്കാന്തിന്റെ പേരില് ഓണ്ലൈന് തട്ടിപ്പ്. വ്യാജ വാട്സ്ആപ്പ് അക്കൗണ്ട് ഉണ്ടാക്കി കൊല്ലത്തെ അദ്ധ്യാപികയില് നിന്നും 14 ലക്ഷം രൂപയാണ് തട്ടിയത്. കൊല്ലം കുണ്ടറ സ്വദേശിനിയാണ് തട്ടിപ്പിനിരയായത്. ഓണ്ലൈന് ലോട്ടറി അടിച്ചുവെന്ന് പറഞ്ഞു കൊണ്ടുള്ള സന്ദേശമാണ് ഇവര്ക്ക് ആദ്യം ലഭിക്കുന്നത്.
സമ്മാനത്തുക ലഭിക്കണമെങ്കില് ഇതിന്റെ നികുതിപണം കമ്പനിയ്ക്ക് നല്കണമെന്ന സന്ദേശവും ലഭിച്ചു. സംശയം തോന്നി തിരികെ മെസേജ് അയച്ചപ്പോള് ഡിജിപിയുടെ സന്ദേശമാണ് ഇവര്ക്ക് പിന്നീട് ലഭിച്ചത്. ടാക്സ് അടയ്ക്കണമെന്നും, അല്ലാത്തപക്ഷം നിയമനടപടി നേരിടേണ്ടി വരുമെന്നുമാണ് ഇതില് പറഞ്ഞിരുന്നത്. ഡിജിപി അനില്കാന്തിന്റെ ചിത്രം സഹിതമായിരുന്നു സന്ദേശം. താന് ഇപ്പോള് ഡല്ഹിയിലാണെന്നും ഈ സന്ദേശത്തില് സൂചിപ്പിച്ചിരുന്നു.
സംശയം തീര്ക്കാന് പോലീസ് ആസ്ഥാനത്തേക്ക് അദ്ധ്യാപിക വിളിച്ചു. ഡിജിപി ഡല്ഹിക്ക് പോയെന്ന മറുപടിയാണ് അവിടെ നിന്ന് ലഭിച്ചത്. ഇതോടെ തന്റെ ഫോണിലേക്ക് സന്ദേശം അയക്കുന്നത് ഡിജിപിയാണെന്ന് അദ്ധ്യാപിക ഉറപ്പിച്ചു. തുടര്ന്നാണ് ഇവര് പണം കൈമാറിയത്. എന്നാല് താന് തട്ടിപ്പില് പെടുകയായിരുന്നുവെന്ന് മനസിലാക്കിയതോടെയാണ് ഇവര് പോലീസില് പരാതി നല്കിയത്. അന്വേഷണത്തില് അസം സ്വദേശിയുടെ പേരിലെടുത്ത നമ്പറില് നിന്നാണ് വ്യാജ വാട്സ്ആപ്പ് അക്കൗണ്ട് ഉണ്ടാക്കി തട്ടിപ്പ് നടത്തിയതെന്ന് കണ്ടെത്തിയിട്ടുണ്ട്. തട്ടിപ്പ് സംഘത്തിന് വേണ്ടി വിശദമായ അന്വേഷണം നടത്തി വരികയാണെന്നും പോലീസ് വ്യക്തമാക്കി.
Comments