ന്യൂഡൽഹി : ഓപ്പറേഷൻ ഗംഗയിലൂടെ യുക്രെയ്നിൽ നിന്നുള്ള ഇന്ത്യക്കാരെ അതിവേഗം ഒഴിപ്പിച്ച് കേന്ദ്രസർക്കാർ. ഖാർകീവിൽ നിന്നും മുഴുവൻ ഇന്ത്യക്കാരെയും ഒഴിപ്പിച്ചതായി കേന്ദ്രസർക്കാർ അറിയിച്ചു. സുമിയിലെ രക്ഷാപ്രവർത്തനങ്ങളിൽ ആണ് കേന്ദ്രസർക്കാർ നിലവിൽ ശ്രദ്ധ ചെലുത്തുന്നത്.
സുമിയിൽ 700 ഓളം വിദ്യാർത്ഥികൾ കുടുങ്ങിക്കിടക്കുന്നുണ്ടെന്നാണ് വിവരമെന്ന് കേന്ദ്രവിദേശകാര്യവക്താവ് അരിന്ദം ബാഗ്ചി പറഞ്ഞു. ഇവരെ മോചിപ്പിക്കുന്നതിലാണ് ഇപ്പോൾ കേന്ദ്രസർക്കാർ ശ്രദ്ധചെലുത്തുന്നത്. വിദ്യാർത്ഥികളെ സുരക്ഷിതരായി ഇന്ത്യയിലേക്ക് എത്തിക്കാൻ എല്ലാമാർഗ്ഗങ്ങളും പരിഗണിക്കുന്നുണ്ടെന്നും അദ്ദേഹം വ്യക്തമാക്കി.
നിലവിൽ സുമിയിലാണ് റഷ്യ ശക്തമായ ആക്രമണം നടത്തുന്നത്. കനത്ത ഷെല്ലാക്രമണത്തിനിടെ വിദ്യാർത്ഥികളെ സുരക്ഷിത സ്ഥാനത്തേക്ക് മാറ്റുക എന്നത് ഏറെ വെല്ലുവിളി നിറഞ്ഞ കാര്യമാണ്. 15,000ത്തോളം പേരെ ഇതിനോടകം തന്നെ സുരക്ഷിതരായി രാജ്യത്ത് എത്തിച്ചിട്ടുണ്ട്. വരും മണിക്കൂറുകളിൽ കൂടുതൽ വിമാനങ്ങൾ വിദ്യാർത്ഥികളുമായി രാജ്യത്ത് എത്തുമെന്നും അദ്ദേഹം കൂട്ടിച്ചേർത്തു.
Comments