ന്യൂഡൽഹി: ഉത്തർപ്രദേശിൽ തിരഞ്ഞെടുപ്പ് ഫലങ്ങൾ പുറത്ത് വന്നതിന് പിന്നാലെ ബിഎസ്പി നേതാവ് മായാവതിയേയും, എഐഎംഐഎം നേതാവ് അസദുദ്ദീൻ ഒവൈസിക്കെതിരെയും രൂക്ഷ വിമർശനവുമായി ശിവസേന നേതാവ് സഞ്ജയ് റാവത്ത്. സംസ്ഥാനത്ത് ബിജെപി വൻ വിജയം നേടിയതിന് മായാവതിയുടേയും ഒവൈസിയുടേയും പാർട്ടികൾ നൽകിയ സംഭാവനകൾ പരിഗണിച്ച് അവർക്ക് യഥാക്രമം പത്മവിഭൂഷണും ഭാരതരത്നയും നൽകണമെന്നായിരുന്നു പരിഹാസം.
ബിജെപിയുടെ വിജയം സംബന്ധിച്ചുള്ള മാദ്ധ്യമപ്രവർത്തകരുടെ ചോദ്യത്തോടായിരുന്നു സഞ്ജയ് റാവത്തിന്റെ പ്രതികരണം. ബിജെപി ഉത്തർപ്രദേശിൽ മികച്ച വിജയമാണ് നേടിയതെന്നും, ആ വിജയത്തിൽ പങ്കാളികളായതിന് മായാവതിക്കും ഒവൈസിക്കും പുരസ്കാരം നൽകണമെന്നാണ് സഞ്ജയ് റാവത്ത് പറഞ്ഞത്. ഉത്തർപ്രദേശിലെ ഏറ്റവും വലിയ രാഷ്ട്രീയ പാർട്ടികളിലൊന്നായിരുന്ന ബിഎസ്പിക്ക് ഇക്കുറി തിരഞ്ഞെടുപ്പിൽ ഒരു സീറ്റ് മാത്രമാണ് നേടാനായത്. ഒവൈസിയുടെ പാർട്ടിക്കാകട്ടെ, സംസ്ഥാനത്ത് ഒരു അക്കൗണ്ട് പോലും തുറക്കാനും സാധിച്ചില്ല.
