ന്യൂഡൽഹി : അഞ്ച് സംസ്ഥാനങ്ങളിലെ തിരഞ്ഞെടുപ്പിൽ ഉണ്ടായ ദയനീയ പരാജയം ചർച്ച ചെയ്യാൻ കോൺഗ്രസ് പ്രവർത്തക സമിതി യോഗം ചേരും. ഞായറാഴ്ച വൈകീട്ട് നാല് മണിയ്ക്കാണ് യോഗം ചേരുക. ഡൽഹിയിലെ എഐസിസി ആസ്ഥാനത്താണ് അംഗങ്ങൾ ഒത്തു ചേരുക.
നിയമസഭാ തിരഞ്ഞെടുപ്പ് നടന്ന അഞ്ച് സംസ്ഥാനങ്ങളിലെയും കോൺഗ്രസിന്റെ പ്രകടനം യോഗം വിലയിരുത്തും. നിലവിലെ രാഷ്ട്രീയ സാഹചര്യവും യോഗം പരിശോധിക്കും. നിയമസഭാ തിരഞ്ഞെടുപ്പിലെ തോൽവി കോൺഗ്രസിനെ ഞെട്ടിച്ചിരുന്നു. ഈ സാഹചര്യത്തിൽ ലോക്സഭാ തിരഞ്ഞെടുപ്പിനെ എങ്ങിനെയെല്ലാം നേരിടാം എന്ന കാര്യങ്ങളും യോഗത്തിൽ ചർച്ചയാകുമെന്നാണ് സൂചനകൾ.
കോൺഗ്രസിന് ശക്തമായ സ്വാധീനം ഉണ്ടായിരുന്ന പഞ്ചാബിൽ ആംആദ്മി ഉണ്ടാക്കിയ നേട്ടം കോൺഗ്രസിനെ പ്രതിരോധത്തിലാക്കിയിട്ടുണ്ട്. അതുകൊണ്ട് തന്നെ പഞ്ചാബിലുണ്ടായ വീഴ്ചകൾ യോഗം ചർച്ച ചെയ്യും. ചരിത്രത്തിൽ ഏറ്റവും വലിയ തോൽവിയാണ് തിരഞ്ഞെടുപ്പിൽ കോൺഗ്രസിന് നേരിടേണ്ടിവന്നത്. ഈ സാഹചര്യത്തിൽ യോഗത്തിൽ വിമർശനങ്ങളും ഉയർന്നുവരാനാണ് സാദ്ധ്യത.
Comments