ലക്നൗ : ഇന്ത്യയിൽ എത്തുന്ന നേപ്പാൾ പ്രധാനമന്ത്രി ഷേർ ബഹദൂർ ദേബ കാശി വിശ്വനാഥ ക്ഷേത്രത്തിൽ ദർശനം നടത്തും. മൂന്ന് ദിവസത്തെ സന്ദർശനത്തിനായി ഏപ്രിൽ ഒന്നിനാണ് അദ്ദേഹം ഉത്തർപ്രദേശിൽ എത്തുക. കാശി വിശ്വനാഥ ക്ഷേത്രത്തിന് പുറമേ നേപ്പാളി ക്ഷേത്രം എന്ന് അറിയപ്പെടുന്ന ശ്രീ സമ്രജേശ്വർ പശുപതിനാഥ് മഹാദേവ ക്ഷേത്രത്തിലും അദ്ദേഹം ദർശനം നടത്തും.
കാശിവിശ്വനാഥ ഇടനാഴി ഉദ്ഘാടനം ചെയ്ത ശേഷം ആദ്യമായാണ് ഒരു ലോകനേതാവ് ഇവിടെയെത്തുന്നത്. മൂന്ന് മണിക്കൂറിലധികം സമയം ദേബ ഇവിടെ ചിലവഴിക്കുമെന്നാണ് റിപ്പോർട്ടുകൾ. ഇതിന് ശേഷമാകും ദുബൈ ശ്രീ സമ്രജേശ്വർ പശുപതിനാഥ് മഹാദേവ ക്ഷേത്രം സന്ദർശിക്കുക. ലളിത ഘട്ടിൽ സ്ഥിതി ചെയ്യുന്ന ഈ മഹാദേവ ക്ഷേത്രം 1800 നും 1804 നും ഇടയിൽ നേപ്പാളി രാജാവായ റാണാ ബഹദൂർ ഷായാണ് നിർമ്മിച്ചത്.
ഏപ്രിൽ ഒന്നു മുതൽ മൂന്നുവരെയാണ് ദേബ ഇന്ത്യ സന്ദർശിക്കുക. വരാണസിയിൽ എത്തുന്ന അദ്ദേഹം രണ്ടാം തിയതി പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തും. കഴിഞ്ഞ വർഷം ജൂലൈ 21 നാണ് പ്രധാനമന്ത്രിയായി ദേബ അധികാരമേറ്റത്. ഇതിന് ശേഷമുള്ള ആദ്യ ഇന്ത്യാ സന്ദർശനം കൂടിയാണ് ഏപ്രിൽ നടക്കാനിരിക്കുന്നത്.
Comments