രാജവെമ്പാലകൾ മറ്റ് പാമ്പുകളെ ഭക്ഷണമാക്കാറുണ്ടെന്ന് നമുക്കറിയാം. പലപ്പോഴും രാജവെമ്പാലകളുടെ പ്രധാന ഭക്ഷണം സ്വന്തം വർഗത്തിൽപ്പെട്ട ജീവികൾ തന്നെയാണെന്നതാണ് പ്രത്യേകത. പ്രകോപനമുണ്ടായാൽ അതീവ അപകടകാരിയാകുന്ന രാജവെമ്പാല ലോകത്തിലെ ഏറ്റവും നീളംകൂടിയ വിഷപാമ്പാണ്.
പലപ്പോഴും ആഹാരശേഷം മാസങ്ങളോളം മറ്റ് ഭക്ഷണമൊന്നും വേണ്ടാതെ ഇവ ഒതുങ്ങിക്കൂടാറുമുണ്ട്. അത്തരത്തിൽ മറ്റൊരു ഭീമൻ പാമ്പിനെ വിഴുങ്ങുന്ന രാജവെമ്പാലയുടെ വീഡിയോ ദൃശ്യമാണ് ഇൻസ്റ്റഗ്രാമിൽ ഇപ്പോൾ തരംഗമാകുന്നത്. സ്നേക്ക് വേൾഡ് എന്ന പേജിൽ നിന്നുള്ളതാണ് വീഡിയോ. ദൃശ്യങ്ങളിൽ പാമ്പിന്റെ മാളത്തിൽ ചെന്ന് അത്യാർത്തിയോടെ ഇരയെ വിഴുങ്ങുന്ന രാജവെമ്പാലയെ കാണാം.
ഇരയായ പാമ്പിന്റെ മാളത്തിലേക്ക് കയറി ചെന്നാണ് രാജവെമ്പാല വേട്ട നടത്തുന്നതെന്ന് ദൃശ്യങ്ങളിൽ വ്യക്തമാണ്. പാമ്പിനെ വിഴുങ്ങാൻ ആരംഭിച്ചതോടെ ഭ്രാന്ത് പിടിച്ചതിന് സമാനമായി രാജവെമ്പാല കിടന്ന് ഉരുളുന്നതും ദൃശ്യങ്ങളിൽ കാണാം. വയറിനുള്ളിലേക്ക് ഭീമൻ പാമ്പിനെ എളുപ്പത്തിൽ കയറ്റുന്നതിന് വേണ്ടിയാണ് രാജവെമ്പാല കിടന്ന് ഉരുളുന്നത്. വീഡിയോ പോസ്റ്റ് ചെയ്ത് മിനിറ്റുകൾക്കുള്ളിൽ അരലക്ഷത്തോളം കാഴ്ചക്കാരെ ദൃശ്യങ്ങൾ നേടി.
സാധാരണയായി 19 അടിയോളം നീളം വരുന്ന കൂറ്റൻ പാമ്പാണ് രാജവെമ്പാല. കടിയേറ്റാൽ മുപ്പത് മിനിറ്റിനുള്ളിൽ മരണം സംഭവിക്കാമെന്നാണ് പറയപ്പെടുന്നത്. ഒറ്റ ആക്രമണത്തിൽ ഒന്നിലധികം കടികൾ നൽകാൻ കഴിയുള്ളവയാണ് ഇവ. ഒറ്റത്തവണ കടിക്കുന്നതിലൂടെ ദേഹത്ത് ഏറ്റവുമധികം വിഷം കുത്തിവെക്കാൻ കഴിയുന്ന പാമ്പുകളിലൊന്നാണ് രാജവെമ്പാല.
