വീട്ടിൽ കക്കാൻ കയറിയ അജ്ഞാതരെ 18കാരിയായ വിദ്യാർത്ഥിനി പമ്പകടത്തിയെന്ന് പറഞ്ഞാൽ നിങ്ങൾ വിശ്വസിക്കുമോ.. അതിശയോക്തിയല്ല, മറിച്ച് സൂറത്തിൽ കഴിഞ്ഞ ദിവസം നടന്ന സംഭവമാണിത്.
കറന്റ് പോയ സമയത്ത് വീട്ടിൽ മോഷ്ടിക്കാൻ കയറിയ കള്ളന്മാരെയാണ് തക്കസമയത്തെ ഇടപെടൽ കൊണ്ട് റിയ സ്വയിൻ എന്ന 18 കാരി അടിച്ചോടിച്ചത്. സൂറത്തിലെ കഡോദര ജിഐഡിസി പോലീസ് സ്റ്റേഷൻ പരിധിയിൽ ബുധനാഴ്ച പുലർച്ചെയാണ് സംഭവം.
രാത്രി ഉറക്കമിളച്ചിരുന്ന് പഠിക്കുകയായിരുന്നു റിയ. അപ്പോഴാണ് പെട്ടെന്ന് കറന്റ് പോയത്. ഈ സമയത്ത് റിയയുടെ വീട്ടിൽ മൂന്ന് കള്ളൻമാർ കേറി. വീടിന്റെ പിൻഭാഗത്ത് നിന്നും സംശയാസ്പദമായ രീതിയിൽ ശബ്ദം കേട്ടതോടെ റിയ ജാഗ്രത കൈവരിച്ചു. പെട്ടെന്നാണ് തന്റെ മുന്നിൽ കത്തിയുമായി കള്ളന്മാരിലൊരാൾ എത്തിയത്. അപ്പോഴേക്കും കറന്റ് വരികയും ചെയ്തു.
ഇതിനിടെ റിയയുടെ കഴുത്തിൽ കത്തിവെച്ച് കള്ളൻ ഭീഷണിപ്പെടുത്തി. തൊട്ടപ്പുറത്ത് കിടന്ന് ഉറങ്ങുകയായിരുന്ന അനുജത്തിയെയും അവർ ആക്രമിക്കാൻ നിന്നു. അപ്പോഴേക്കും മൂന്ന് കള്ളൻമാരും റിയയുടെ മുറിയിലേക്ക് എത്തിയിരുന്നു. എന്നാൽ മനസാന്നിധ്യവും ധൈര്യവും കൈവിടാതെ റിയ കുതറി മാറി അനുജത്തിയെ രക്ഷിച്ചു. ഇതിനിടയിൽ റിയയുടെ ഇടത് കൈയിൽ കള്ളൻമാർ കത്തികൊണ്ട് കുത്തി.
നിലവിളിച്ച് ശബ്ദമുണ്ടാക്കിയതോടെ അമ്മയും ഇവരുടെ അരികിലെത്തി. മൂന്ന് പേരും കൂടെ കള്ളൻമാരെ ആക്രമിക്കാൻ ശ്രമിച്ചു. പന്തിയില്ലെന്ന് തോന്നിയ കള്ളന്മാർ അയൽപ്പക്കത്തുള്ളവർ എത്തുമെന്ന് ഭയന്ന് ഓടിരക്ഷപ്പെട്ടു. റിയ നൽകിയ വിവരങ്ങളുടെ അടിസ്ഥാനത്തിൽ കള്ളന്മാർക്കായുള്ള അന്വേഷണത്തിലാണ് പോലീസ്.
Comments