ഇസ്ലാമാബാദ്: പാകിസ്താൻ പ്രധാനമന്ത്രി ഇമ്രാൻ ഖാനെ പരിഹസിച്ച് മുൻ ഭാര്യയും സാമൂഹ്യപ്രവർത്തകയുമായ റെഹം ഖാൻ. ദൈവകൃപയാൽ എല്ലാം നേടിയെന്ന് ഇമ്രാൻ ഖാൻ പറയുന്നു എന്നാൽ അദ്ദേഹത്തിന് ഇല്ലാത്തതായി ഒന്നുണ്ട്, അത് ബുദ്ധിയാണെന്ന് റെഹം ഖാൻ പറഞ്ഞു.
നിങ്ങൾ പ്രധാനമന്ത്രി അല്ലാത്തപ്പോൾ പാകിസ്താൻ മഹത്തരമായിരുന്നുവെന്ന് അവർ കൂട്ടിച്ചേർത്തു. കഴിഞ്ഞ ദിവസം രാജ്യത്തെ അഭിസംബോധന ചെയ്ത് സംസാരിക്കുന്നതിനിടെ പാക് പ്രധാനമന്ത്രി നടത്തിയ പരാമർശങ്ങളോട് പ്രതികരിക്കുകയായിരുന്നു റെഹം ഖാൻ.
രാഷ്ട്രീയത്തിൽ ഇറങ്ങിത്തിരിച്ചത് നീതി, മനുഷ്യത്വം, സ്വയം പര്യാപ്തത എന്നീ മൂന്ന് ലക്ഷ്യങ്ങൾ നിറവേറ്റാനാണ്. ദൈവം എനിക്ക് സമ്പത്തും പ്രശസ്തിയും തന്നു. തന്നെക്കാൾ അഞ്ച് വയസ്സ് പ്രായം മാത്രമാണ് പാകിസ്താന് ഉള്ളത്. പ്രധാനമന്ത്രി പദവിയിൽ നിന്നും താൻ രാജിവെച്ചാൽ അതിന്റെ അനന്തഫലം പാകിസ്താൻ അനുഭവിക്കും. ഇപ്പോഴുള്ള സാഹചര്യത്തിന് പിന്നിൽ ചില വിദേശ ശക്തികളുടെ ഇടപെടലുകളാണ്. താൻ പുറത്തുപോയാൽ പാകിസ്താൻ അത് ക്ഷമിക്കില്ലെന്നായിരുന്നു ഇമ്രാൻ ഖാന്റെ പരാമർശം.
കുട്ടിക്കാലത്ത് പാകിസ്താന്റെ ഉയർച്ച കണ്ടിരുന്നുവെന്നും അദ്ദേഹം പറഞ്ഞിരുന്നു. ഇതിന് പിന്നാലെ രൂക്ഷ വിമർശനമായിരുന്നു പാക് പ്രധാനമന്ത്രിയ്ക്കെതിരെ ഉയർന്നത്. അധികാരത്തിൽ നിന്ന് പുറത്ത് പോകാതെ മുടന്തൻ ന്യായങ്ങൾ നിരത്തുന്ന ഇമ്രാന്റെ പ്രവർത്തികളെ അംഗീകരിക്കാനാവില്ലെന്നായിരുന്നു പലരുടേയും വിമർശനം. ഇതിന് പിന്നാലെയാണ് റെഹം ഖാനും പാക് പ്രധാനമന്ത്രിയെ വിമർശിച്ച് രംഗത്തെത്തിയത്.
Comments