ബംഗളൂരു : ഭഗവാൻ ഹനുമാന്റെ ജന്മസ്ഥലം കർണാടകയാണെന്ന് ബിജെപി എംപി തേജസ്വി സൂര്യ. അഞ്ജനാദ്രി ക്ഷേത്രത്തിൽ ദർശനം നടത്തിയ ശേഷം മാദ്ധ്യമങ്ങളോട് ആയിരുന്നു അദ്ദേഹത്തിന്റെ പ്രതികരണം. അഞ്ജനാദ്രി മലനിരകളാണ് ജന്മസ്ഥാനമെന്നത് ആർക്കും സംശയമില്ലാത്ത കാര്യമാണെന്നും അദ്ദേഹം പറഞ്ഞു.
ഹനുമാന്റെ ജന്മസ്ഥാനം തിരുമലയിലാണെന്നാണ് ആന്ധ്രാപ്രദേശിന്റെ വാദം. ഇതിനോട് ആയിരുന്നു തേജസ്വി സൂര്യയുടെ പ്രതികരണം. ഹനുമാന്റെ ജന്മസ്ഥാനത്തെക്കുറിച്ച് നിരവധി വാദങ്ങൾ ഉണ്ട്. എന്നാൽ അതൊന്നും പ്രശ്നമല്ല. ഹനുമാൻ ജനിച്ച കിഷ്കിന്ത ഇവിടെയാണെന്നും അദ്ദേഹം പറഞ്ഞു.
പാരമ്പര്യത്തിലാണ് നമ്മുടെ രാജ്യം വിശ്വസിക്കുന്നത്. ഇത് ഒരിക്കലും തിരസ്കരിക്കാൻ കഴിയില്ല. കർണാടകയുടെ മേഖലകളിലാണ് രാമായണം രചിച്ച വാത്മീകിയുടെ ജന്മദേശം. ഇതുമായി ബന്ധപ്പെട്ട തെളിവുകളും ലഭിച്ചിട്ടുണ്ടെന്നും തേജസ്വി സൂര്യ കൂട്ടിച്ചേർത്തു.
ബിജെപി സംഘടിപ്പിക്കുന്ന ഭാരത് ദർശൻ യാത്രയുടെ ഭാഗമായാണ് തേജസ്വി സൂര്യ ക്ഷേത്രം സന്ദർശിച്ചത്. വിജയനഗർ ജില്ലയിലെ അനിഗോണ്ടിയ്ക്ക് സമീപമാണ് അഞ്ജനാദ്രി മലനിരകൾ. പ്രദേശത്തെ വികസനത്തിനായി അടുത്തിടെ കർണാടക സർക്കാർ 100 കോടി രൂപ അനുവദിച്ചിരുന്നു.
Comments