അമരാവതി: മദ്യത്തിനും മദ്യപാനത്തിനും പേരുകേട്ട ആന്ധ്രാപ്രദേശിൽ മദ്യപിച്ച് ലക്കുക്കെട്ട് വിദ്യാർത്ഥി ക്ലാസ് മുറിയിലെത്തിയെന്ന് റിപ്പോർട്ട്. ഗോദാവരി ജില്ലയിലെ സർക്കാർ സ്കൂളിലാണ് സംഭവം. ഒമ്പതാം ക്ലാസ് വിദ്യാർത്ഥിയാണ് മദ്യപിച്ചെത്തിയത്. വിവരം പുറത്തുവന്നതോടെ അന്വേഷണത്തിന് ഉത്തരവിട്ടിരിക്കുകയാണ് സ്കൂൾ അധികൃതർ.
ഉച്ചഭക്ഷണത്തിനായി പിരിഞ്ഞതിന് ശേഷം ക്ലാസ് തുടങ്ങിയപ്പോഴാണ് വിദ്യാർത്ഥി മദ്യപിച്ചെത്തിയത്. സഹപാഠികളോടൊപ്പം മദ്യപിക്കുകയായിരുന്നു എന്നാണ് വിവരം. കുട്ടിയുട പിതാവ് അമിത മദ്യപാനിയാണെന്ന് അദ്ധ്യാപകരും പറയുന്നു. വിദ്യാർത്ഥിക്ക് ഇതിനോടകം ടിസി നൽകി പറഞ്ഞുവിട്ടതായാണ് വാർത്തകൾ പുറത്തുവരുന്നത്.
ഏതാനും ദിവസങ്ങൾക്ക് മുമ്പ് തമിഴ്നാട്ടിൽ വിദ്യാർത്ഥികൾ ബസിലിരുന്ന് മദ്യപിച്ചത് വലിയ വാർത്തയായിരുന്നു. സഞ്ചരിക്കുന്ന ബസിൽ നിന്നായിരുന്നു ഒരു കൂട്ടം വിദ്യാർത്ഥികളായ ആൺകുട്ടികളും പെൺകുട്ടികളും മദ്യപിച്ചിരുന്നത്. ഇതിന്റെ വീഡിയോ ദൃശ്യങ്ങളും സോഷ്യൽ മീഡിയയിൽ പ്രചരിച്ചു. സർക്കാർ സ്കൂളിലെ വിദ്യാർത്ഥികളായിരുന്ന കുട്ടികൾക്കെതിരെ സംഭവത്തിന് പിന്നാലെ നടപടി സ്വീകരിച്ചിരുന്നു.
