ശ്വാസകോശം സ്പോഞ്ച് പോലെയാണ്…. ശരാശരി പുകവലിക്കാർ അറിഞ്ഞിരിക്കേണ്ട കാര്യങ്ങൾ- വീഡിയോ

ശ്വാസകോശം സ്പോഞ്ച് പോലെയാണ്…. ഈ പരസ്യം ഒരു ഓർമ്മപ്പെടുത്തലാണ്. പുകവലി വരുത്തുന്ന പൊല്ലാപ്പിനെക്കുറിച്ചുളള മുന്നറിയിപ്പ്. പക്ഷെ പരസ്യം കേട്ടിട്ടും സിനിമയുടെ ഇടവേളയിൽ തിയറ്ററിലെ സ്‌മോക്കിംഗ് കോർണറിലേക്ക് ഓടിപ്പോയി ഒരു സിഗരറ്റിന് തീ കൊളുത്തുന്നവരാണ് കൂടുതൽ പേരും. എന്നാൽ പുകവലിക്കാരെ ജാഗ്രത, നിങ്ങളുടെ ഈ ദുശ്ശീലം ഹൃദയാഘാതത്തെ അതിജീവിക്കാനുള്ള സാദ്ധ്യതയെ വരെ ഇല്ലാതാക്കും..

കരളിലെ പ്രോട്ടീനായ ആൽഫ-1 ആന്റി ട്രിപ്‌സിൻ (A1AT)ന്റെ അളവ് പുകവലിക്കാരിൽ കുറവാണെന്നാണ് കണ്ടെത്തൽ. ഹൃദയാഘാതം ഉണ്ടാകുമ്പോൾ ആൽഫ-1 ആന്റി ട്രിപ്‌സിൻ ആണ് ഹൃദയ കോശങ്ങൾക്ക് സംരക്ഷണം നൽകുന്നത്. പുകവലിക്കുന്നവരിൽ ഇതിന്റെ അളവ് കുറയുന്നതോടെ ഹൃദയാഘാതത്തിനുള്ള സാദ്ധ്യത കൂടുന്നു. യുഎസിൽ പ്രതിവർഷം ഏകദേശം 1.5 ദശലക്ഷം ഹൃദയാഘാതങ്ങളും പക്ഷാഘാതങ്ങളും സംഭവിക്കുന്നുണ്ടെന്നാണ് റിപ്പോർട്ട്. ജോർദാൻ യൂണിവേഴ്‌സിറ്റി ഓഫ് സയൻസ് ആന്റ് ടെക്‌നോളജിയിലെ ഗവേഷകർ നടത്തിയ പഠനത്തിലാണ് ഈ കണ്ടെത്തൽ. ‘എക്‌സ്പിരിമെന്റൽ ബയോളജി’ എന്ന ജേണലിലാണ് പഠനം പ്രസിദ്ധീകരിച്ചത്.

പുക വലിക്കാത്തവരെ അപേക്ഷിച്ച് പുകവലിക്കുന്നവർക്ക് ഹൃദയാഘാതത്തെ അതിജീവിക്കാനുള്ള സാദ്ധ്യത കുറവാണെന്നും പഠനം പറയുന്നു. ഇതുകൊണ്ട് മാത്രം അവസാനിക്കുന്നില്ല പുകവലിയുടെ ദോഷങ്ങൾ. പുകവലി ഹൃദയപേശികളിലേക്ക് ഓക്‌സിജൻ എത്തിക്കുന്ന രക്തക്കുഴലുകൾക്കുള്ളിൽ കാഠിന്യത്തിനും ഫലകങ്ങൾ അടിഞ്ഞുകൂടുന്നതിനും കാരണമാകുന്നു. ഇത് ഹൃദയമിടിപ്പ് വർദ്ധിപ്പിക്കുകയും പ്രധാന ധമനികളെ ശക്തമാക്കുകയും ചെയ്യുന്നു. ഇവയെല്ലാം ഹൃദയത്തെ ബാധിക്കാമെന്നാണ് ഗവേഷണങ്ങൾ പറയുന്നത്. ലോകമെമ്പാടുമുള്ള 10-15 ശതമാനം ഹൃദയ സംബന്ധമായ മരണങ്ങൾക്ക് പുകവലി ഒരു കാരണമാണ്.

ഒരു സിഗരറ്റിലെ പ്രധാന രാസ സംയുക്തം നിക്കോട്ടിൻ ആണെങ്കിലും, മറ്റ് സജീവ ഘടകങ്ങളും ടാർ, കാർബൺ മോണോക്സൈഡ് തുടങ്ങിയ രാസവസ്തുക്കളും ഹൃദയത്തിന് അപകടകരമാണ്. പുകയിലയുടെ പുകയിൽ, കാൻസറിന് കാരണമാകുന്ന, 70 ൽപ്പരം രാസവസ്തുക്കളാണ് അടങ്ങിയിരിക്കുന്നത്

പുകയിലയിൽ അടങ്ങിയിട്ടുള്ള നിക്കോട്ടിൻ വളരെ ആസക്തിയുള്ള സൈക്കോ ആക്റ്റീവ് മരുന്നാണ്. ആഗോളതലത്തിൽ തടയാൻ കഴിയുന്ന ഏറ്റവും വലിയ മരണകാരണം പുകയില ഉപയോഗമാണെന്നാണ് പറയുന്നത്. പുകയില ഉപയോഗിക്കുന്നവരിൽ പകുതിയോളം പേരും പുകയില ഉപയോഗത്തിന്റെ സങ്കീർണതകളാലാണ് മരിക്കുന്നതും. ഓരോ വർഷവും പുകയില 6 ദശലക്ഷം മരണങ്ങൾക്ക് കാരണമാകുന്നു എന്നാണ് ലോകാരോഗ്യ സംഘടന കണക്കാക്കുന്നത്. ഇരുപതാം നൂറ്റാണ്ടിൽ പുകയില 100 ദശലക്ഷം മരണങ്ങൾക്ക് കാരണമായതായും കണക്കാക്കപ്പെടുന്നു.

ഇനിയും മാറി നിന്ന് വലിക്കാൻ ഒരു സിഗരറ്റ് കയ്യിലെടുക്കുമ്പോൾ ഓരോരുത്തരും ഓർക്കണം, നാം നമ്മുടെ ജീവൻ മാത്രമല്ല, ചുറ്റുമുള്ള കൂട്ടുകാരുടേയും ബന്ധുക്കളുടെയും ജീവൻ കൂടി അപകടത്തിലാക്കുകയാണെന്ന്…