ന്യൂഡൽഹി: ബോളിവുഡ് നടി സോനം കപൂറിന്റെയും ഭർത്താവ് ആനന്ദ് അഹൂജയുടെയും ഡൽഹിയിലെ വസതിയിൽ വൻ കവർച്ച. 2.4 കോടി രൂപയുടെ സ്വർണാഭരണങ്ങളും പണവും കവർന്നുവെന്ന് പോലീസ് പറഞ്ഞു. നിലവിൽ ഭർത്താവിനൊപ്പം ലണ്ടനിലാണ് സോനം കപൂർ താമസിക്കുന്നത്. ആനന്ദിന്റെ മാതാപിതാക്കളായ ഹരീഷ് അഹൂജ, പ്രിയ അഹൂജ, മുത്തശ്ശി സർള അഹൂജ എന്നിവരാണ് മോഷണം നടന്ന ഡൽഹിയിലെ വസതിയിൽ താമസിച്ചിരുന്നത്.
ഫെബ്രുവരി 11നാണ് മോഷണം നടന്നത്. രണ്ടാഴ്ചയ്ക്ക് ശേഷം, ഫെബ്രുവരി 23നാണ് കുടുംബം പരാതി നൽകിയത്. സംഭവത്തിൽ അന്വേഷണം പുരോഗമിക്കുകയാണെന്ന് പോലീസ് പത്രകുറിപ്പിൽ പറഞ്ഞു. 1.41 കോടി രൂപയുടെ ആഭരണങ്ങളാണ് മോഷണം പോയത്. എല്ലാം കൂടി 2.4 കോടിയുടെ പണ്ടങ്ങൾ കളവ് പോയെന്നും പരാതിയിൽ പറയുന്നു.
പരാതി ലഭിച്ച ശേഷം സ്റ്റാഫുകളടക്കം വീട്ടിലുള്ള 25 പേരെ പോലീസ് ചോദ്യം ചെയ്തു. സിസിടിവി ദൃശ്യങ്ങളടക്കം പോലീസ് പരിശോധിച്ചുവരികയാണ്. നാളിതുവരെ മോഷ്ടാവിനെ പിടികൂടാനാവാതെ വന്നപ്പോഴാണ് വിശദീകരണവുമായി പോലീസ് രംഗത്തെത്തിയത്.
