അഹമ്മദാബാദ് : ഗുജറാത്തിൽ രാസവസ്തു നിർമ്മാണ ശാലയിൽ സ്ഫോടനം. ആറ് പേർ കൊല്ലപ്പെട്ടു. ബറൂച്ചിൽ പുലർച്ചെ ഒരു മണിയോടെയായിരുന്നു സ്ഫോടനം ഉണ്ടായത്.
ഫാക്ടറിയിലെ റിയാക്ടറിൽ ഉണ്ടായ പൊട്ടിത്തെറിയാണ് വൻ സ്ഫോടനത്തിലേക്ക് വഴിവെച്ചത്. രാത്രി ഏറെ വൈകിയും ഫാക്ടറിയിൽ ജോലികൾ തുടർന്നിരുന്നു. ഇതിനിടെയായിരുന്നു സ്ഫോടനം ഉണ്ടായത്. ഫാക്ടറിയിൽ നിന്നും തീയും പുകയും ഉയരുന്നതു കണ്ട പ്രദേശവാസികൾ ആണ് വിവരം ഫയർഫോഴ്സിനെ അറിയിച്ചത്. ഏറെ നേരത്തെ പരിശ്രമത്തിനൊടുവിൽ തീ നിയന്ത്രണ വിധേയമാക്കി അകത്ത് കുടുങ്ങിയവരെ പുറത്ത് എടുത്തെങ്കിലും മരിച്ചിരുന്നു. കൊല്ലപ്പെട്ട ആറ് പേരും ഫാക്ടറിയിലെ തൊഴിലാളികൾ ആണ്.
ഇവരുടെ മൃതദേഹങ്ങൾ ആശുപത്രിയിൽ സൂക്ഷിച്ചിരിക്കുകയാണ്. ഇതിൽ ഒരാളുടെ മൃതദേഹം തിരിച്ചറിഞ്ഞു. ബാക്കിയുള്ളവരുടെ മൃതദേഹം തിരിച്ചറിയാനുള്ള നടപടികൾ പുരോഗമിക്കുകയാണ്. പോസ്റ്റ്മോർട്ടത്തിന് ശേഷം മൃതദേഹങ്ങൾ ബന്ധുക്കൾക്ക് കൈമാറും.
