പാറ്റ്ന: ബിഹാർ മുഖ്യമന്ത്രി നിതീഷ് കുമാർ പങ്കെടുത്ത പൊതുചടങ്ങിന് സമീപം സ്ഫോടനം. മുഖ്യമന്ത്രി നിന്നിരുന്ന സ്റ്റേജിന് സമീപമാണ് സ്ഫോടനമുണ്ടായത്. ഏകദേശം 20 അടി മാറിയാണ് സ്ഫോടനം നടന്നതെന്ന് അധികൃതർ വ്യക്തമാക്കി. പൊട്ടിത്തെറിയിൽ ആളപായം റിപ്പോർട്ട് ചെയ്തിട്ടില്ല. സ്ഫോടനത്തിന് തീവ്രത കുറവായിരുന്നുവെന്നാണ് വിവരം.
സംഭവവുമായി ബന്ധപ്പെട്ട് ഒരാളെ കസ്റ്റഡിയിലെടുത്തിട്ടുണ്ട്. പൊട്ടിത്തെറിയുണ്ടായതിന് സമീപത്ത് നിന്നാണ് ഇയാളെ പിടികൂടിയത്. പ്രതിയുടെ പക്കൽ നിന്നും തീപ്പെട്ടിയും പടക്കവും കണ്ടെത്തി. ഇയാളെ നിലവിൽ ചോദ്യം ചെയ്ത് വരികയാണ്.
നളന്തയിൽ ഒരു പൊതുചടങ്ങിൽ പങ്കെടുക്കാൻ എത്തിയതായിരുന്നു നിതീഷ് കുമാർ. സ്ഫോടനം സംഭവിച്ചതുമായി ബന്ധപ്പെട്ട് കേസ് രജിസ്റ്റർ ചെയ്തതായും സംഭവത്തിൽ അന്വേഷണം പുരോഗമിക്കുകയാണെന്നും പോലീസ് അറിയിച്ചു. കഴിഞ്ഞ മാസം പൊതുചടങ്ങിനിടെ മുഖ്യമന്ത്രിയെ ഒരു യുവാവ് ആക്രമിക്കാൻ ശ്രമിച്ചിരുന്നു. ഭക്തിയാപൂരിൽ വെച്ചായിരുന്നു സംഭവം.
Comments