ഒരിടവേളയ്ക്ക് ശേഷം സുരേഷ് ഗോപിയും സംവിധായകൻ ജോഷിയും ഒന്നിക്കുന്ന ‘പാപ്പൻ’ എന്ന ചിത്രത്തിന്റെ ട്രെയിലർ പുറത്ത്. താരങ്ങളായ മമ്മൂട്ടിയും മോഹലാലും ചേർന്നാണ് ചിത്രത്തിന്റെ ട്രെയിലർ സമൂഹമാദ്ധ്യമങ്ങളിലൂടെ പുറത്ത് വിട്ടത്. ചിത്രം വൈകാതെ തന്നെ പ്രേക്ഷകരിലേയ്ക്ക് എത്തുമെന്നാണ് സൂചന. മകൻ ഗോകുലും സുരേഷ് ഗോപിയും ഒന്നിക്കുന്ന ആദ്യ ചിത്രം കൂടിയാണ് പാപ്പൻ.
കേരള പോലീസിലെ ലെഫ്റ്റനന്റ് എബ്രഹാം മാത്യൂ മാത്തൻ എന്ന കഥാപാത്രത്തെയാണ് സുരേഷ് ഗോപി അവതരിപ്പിക്കുന്നത്. ജോഷി സംവിധാനം ചെയ്യുന്ന പാപ്പൻ ഒരു ഇൻവസ്റ്റിഗേഷൻ ത്രില്ലറാണ്. ചിത്രത്തിൽ കനിഹ, സണ്ണിവെയിൻ, നൈല ഉഷ തുടങ്ങിയവർ അണിനിരക്കുന്നു. ഡേവിഡ് കാച്ചപ്പിള്ളി പ്രൊഡക്ഷൻസും ക്യൂബ്സ് ഇന്റർനാഷണൽ ഗ്രൂപ്പും ചേർന്നാണ് ചിത്രത്തിന്റെ നിർമ്മാണം. നിഗൂഢതയ്ക്കും സസ്പെൻസിനും വളരെ അധികം പ്രാധാന്യം നൽകുന്ന ചിത്രമാണ് പാപ്പൻ എന്ന് ട്രെയിലറിൽ നിന്നും വ്യക്തമാണ്.
സുരേഷ് ഗോപിയുടെ കരിയറിലെ 252-ാം ചിത്രമായ പാപ്പന്റെ രണ്ടാം ഷെഡ്യൂൾ ഡിസംബർ 13ന് ആരംഭിച്ചിരുന്നു. പിന്നാലെ ജനുവരിയിൽ ചിത്രീകരണവും പൂർത്തിയാക്കി. റേഡിയോ ജോക്കിയും തിരക്കഥാകൃത്തുമായ ആർ ജെ ഷാനിൻറേതാണ് ചിത്രത്തിന്റെ രചന. ഛായാഗ്രഹണം അജയ് ഡേവിഡ് കാച്ചപ്പിള്ളി. എഡിറ്റിംഗ് ശ്യാം ശശിധരൻ. സംഗീതം ജേക്സ് ബിജോയ്.
Comments