ന്യൂഡൽഹി : ശത്രുക്കളെ ലക്ഷ്യസ്ഥാനത്തെത്തി വകവരുത്തുന്നതിന് കരുത്ത് വർദ്ധിപ്പിക്കാനൊരുങ്ങി ഇന്ത്യൻ സൈന്യം. ആകാശ് പ്രൈം മിസൈലിന്റെ രണ്ട് പുതിയ റെജിമെന്റുകൾ വാങ്ങാനാണ് തീരുമാനം. ആകാശ് മിസൈലിന്റെ പുതിയ പതിപ്പായ ആകാശ് പ്രൈമിൽ രാജ്യം തദ്ദേശീയമായി നിർമ്മിച്ച ആക്ടീവ് റേഡിയോ ഫ്രീക്വൻസി സീക്കർ സജ്ജീകരിച്ചിട്ടുണ്ട്. ഉയർന്ന ഉയരത്തിൽ കുറഞ്ഞ താപനിലയുള്ള അന്തരീക്ഷത്തിലും ഇത് മികച്ച പ്രകടനമാണ് കാഴ്ചവെക്കുന്നത്.
ഇന്ത്യൻ ആർമിയുടെ വെസ്റ്റേൺ, സൗത്ത് വെസ്റ്റേൺ കമാൻഡുകൾ ആകാശ് മിസൈലുകളുടെ പരീക്ഷണം ഒന്നിലധികം തവണ നടത്തിയിരുന്നു. പരീക്ഷണം നടത്താൻ ഉപയോഗിച്ച മിസൈലുകൾ ഓപ്പറേഷണൽ റോളിൽ വിന്യസിച്ചതാണെങ്കിലും മികച്ച ഫലം കണ്ടെത്തിയതായി സർക്കാരുമായി ബന്ധപ്പെട്ട ഉന്നത വൃത്തങ്ങൾ അറിയിച്ചു.
ആകാശ് പ്രൈമിന്റെ രണ്ട് പുതിയ റെജിമെന്റുകൾ വാങ്ങുന്നതിലൂടെ രാജ്യത്തിന്റെ വ്യോമ പ്രതിരോധം കൂടുതൽ ശക്തിപ്പെടും. ചൈനയുടെയും പാക്കിസ്താന്റെയും ഭാഗങ്ങളിൽ നിന്നുള്ള വ്യോമാക്രമണങ്ങളെ തടയാനും ഇത് സഹായിക്കുമെന്നും ഉദ്യോഗസ്ഥർ കൂട്ടിച്ചേർത്തു.
4,500 മീറ്റർ വരെ ഉയരത്തിൽ വിന്യസിക്കാവുന്ന ആകാശ് പ്രൈം സംവിധാനം ഏകദേശം 25-30 കിലോമീറ്റർ ദൂരത്തിലുള്ള ലക്ഷ്യം തകർക്കും.
Comments