ജയ്പൂർ : വരന്റെ കൃത്യനിഷ്ഠതയില്ലാത്ത സ്വഭാവം കാരണം വിവാഹത്തിന് വിസമ്മതിച്ച വധു അതേ പന്തലിൽ വെച്ച് മറ്റൊരാളെ വിവാഹം കഴിച്ചു. വിവാഹ ദിവസം മദ്യപിച്ച് കൂട്ടുകാരോടൊപ്പം ആഘോഷിച്ച വരൻ മുഹൂർത്തത്തിന് വിവാഹവേദിയിൽ എത്താൻ വൈകുകയായിരുന്നു. ഇതോടെയാണ് യുവതി മറ്റൊരാളെ വിവാഹം കഴിച്ചത്. രാജസ്ഥാനിലെ രാജ്ഗഡിലുള്ള ചെലാന ഗ്രാമത്തിലാണ് സംഭവം.
ഞായറാഴ്ചയാണ് ഇവരുവരുടെയും വിവാഹം നടത്താൻ നിശ്ചയിച്ചിരുന്നത്. ഇതിനായി വരന്റെ വീട്ടിൽ നിന്ന് രാത്രി 9 മണിയോടെ ഘോഷയാത്ര പുറപ്പെട്ടു. രാത്രി 1.15 നായിരുന്നു മുഹൂർത്തം. എന്നാൽ മദ്യാസക്തിയിൽ വരനും കൂട്ടുകാരും ഡിജെ പാർട്ടി ആഘോഷിച്ചുകൊണ്ട് നിന്നു. ഇവർ വധുവിന്റെ വീട്ടിലെത്താൻ മണിക്കൂറുകളോളം വൈകി. ഇതോടെയാണ് വധു മറ്റൊരാളെ വിവാഹം വഴിക്കാൻ തീരുമാനിച്ചത്.
മദ്യപിച്ച് വിവാഹത്തിനെത്താൻ വൈകിയ യുവാവ് ഭാവിയിലും ഇത് തന്നെ ആവർത്തിക്കാൻ സാദ്ധ്യതയുണ്ടെന്ന് വധു പറഞ്ഞു. ഇതിന് പിന്നാലെയാണ് കുടുംബക്കാർ ചേർന്ന് അതേ പന്തലിൽ വെച്ച് യുവതിയുടെ വിവാഹം മറ്റൊരാളുമായി നടത്തിയത്.
ഇതിന് പിന്നാലെ വരനും ബന്ധുക്കളും പോലീസിൽ പരാതി നൽകി. തുടർന്ന് പോലീസ് ഇരു കൂട്ടരെയും വിളിച്ച് വരുത്തി പ്രശ്നം പരിഹരിക്കുകയായിരുന്നു.
Comments