കാബൂൾ : സ്ത്രീകൾ മുഖവും തലയും മൂടുന്ന തരത്തിൽ ബുർഖ ധരിച്ചുകൊണ്ട് വാർത്ത അവതരിപ്പിക്കണമെന്ന താലിബാന്റെ ഉത്തരവിൽ ലോകത്തെങ്ങും പ്രതിഷേധം ഉയരുന്നു. സ്ത്രീകളുടെ പ്രത്യേകിച്ച് വാർത്താ അവതാരകരുടെ വ്യക്തിസ്വാതന്ത്ര്യം പൂർണമായും ഇല്ലാതാക്കിക്കൊണ്ട് താലിബാൻ പുറപ്പെടുവിച്ച ഉത്തരവിനെതിരെ ലോകത്തിന്റെ വിവിധ കോണുകളിൽ നിന്നും പ്രതിഷേധം ഉയരുന്നുണ്ട്. എന്നാൽ അഫ്ഗാനിലുള്ള അവതാരകർക്ക് ഇത് പാലിക്കാതെ വേറെ വഴിയില്ല.
എന്നാൽ ഇവർക്ക് പിന്തുണയുമായി എത്തിയിരിക്കുകയാണ് പുരുഷ അവതാരകന്മാരും. മാസ്ക് ധരിച്ച് മുഖം മറച്ചുകൊണ്ടാണ് അവർ താലിബാൻ ഭരണകൂടത്തോട് പ്രതിഷേധം അറിയിക്കുന്നത്. സ്ത്രീകൾക്ക് മാത്രം നിയമം വേണ്ടെന്നും അത് പുരുഷന്മാർക്കും ബാധകമാണെന്നുമാണ് അവതാരകന്മാർ ഇതിലൂടെ വ്യക്തമാക്കുന്നത്.
Extraordinary to see male news presenters at @TOLOnews standing with female anchors who have been ordered to cover their faces #journalismisnotacrime pic.twitter.com/VWiFowq5XD
— Yalda Hakim (@BBCYaldaHakim) May 22, 2022
അഫ്ഗാനിലെ പ്രസിദ്ധ ചാനലായ ടോളോ ന്യൂസിലെ അവതാരകർ തങ്ങളുടെ സഹപ്രവർത്തകർക്കൊപ്പം മുഖം മറച്ച് ക്യാമറയ്ക്ക് മുന്നിലെത്തിയത്. ഇതിന്റെ വീഡിയോ സമൂഹമാദ്ധ്യമങ്ങളിൽ പ്രചരിച്ചതോടെ താലിബാനെതിരെ പ്രതിഷേധവുമായി നിരവധി പേർ രംഗത്തെത്തി. സ്ത്രീസ്വാതന്ത്ര്യം പൂർണമായും ഇല്ലാതാക്കുന്ന താലിബാന്റെ നയങ്ങൾ പിൻവലിക്കണമെന്നുളള ആവശ്യങ്ങളാണ് ഉയരുന്നത്.
അത്യാവശ്യ ഘട്ടങ്ങളിൽ മാത്രമേ സ്ത്രീകൾ വീടിന് പുറത്തിറങ്ങാവൂ, പുരുഷന്മാരുടെ തുണയില്ലാതെ പെൺകുട്ടികൾ പോലും പുറത്തിറങ്ങരുത് എന്നിങ്ങനെയുള്ള നിയന്ത്രണങ്ങളും താലിബാൻ ഏർപ്പെടുത്തിയിരുന്നു.
Comments