പ്രണയത്തിന് വേണ്ടി ഏത് കടലും താണ്ടുമെന്നാണ് പൊതുവേയുള്ള ചൊല്ല്. എവിടെ പോയാലും ഞാൻ നിന്നെ തേടിവരുമെന്ന് കമിതാക്കൾ അങ്ങോട്ടുമിങ്ങോട്ടും പറയാറുണ്ടെങ്കിലും മിക്ക സമയങ്ങളിലും ഇത് നടക്കാറില്ല. അതുപോലെ, സ്വന്തം കാമുകനെ കാണാൻ ഒരു രാജ്യത്ത് നിന്നും നീന്തി അയൽ രാജ്യത്തെത്തി എന്ന് പറഞ്ഞാൽ അത് വിശ്വസിക്കാൻ ഇത്തിരി പ്രയാസമാണ്. എന്നാൽ ഈ സംഭവം സത്യമാണ്. കാമുകനെ കാണാനായി ബംഗ്ലാദേശിൽ നിന്നും നീന്തി ഇന്ത്യയിലെത്തിയ കൃഷ്ണ മണ്ഡൽ എന്ന യുവതിയാണ് ഇപ്പോൾ ശ്രദ്ധനേടുന്നത്.
ഫേസ്ബുക്ക് വഴി പരിചയപ്പെട്ട ഇന്ത്യക്കാരനായ യുവാവിനെ കാണാൻ വേണ്ടിയാണ് 22 കാരിയായ യുവതി ബംഗ്ലാദേശിൽ നിന്നും നീന്തിയെത്തിയത്. ബംഗ്ലാദേശ് അതിർത്തിയിൽ നിന്ന് ഒരു മണിക്കൂറോളം നീന്തി സുന്ദർബാൻ കാടുകൾ കടന്നാണ് ഇവർ ഇന്ത്യയിൽ പ്രവേശിച്ചത്. അനധികൃതമായി ഇന്ത്യയിൽ പ്രവേശിച്ച യുവതിയെ പോലീസ് പിന്നീട് പിടികൂടുകയായിരുന്നു.
റോയൽ ബംഗാൾ കടുവകൾക്ക് പേരുകേട്ട സുന്ദർബാനിലേക്കാണ് കൃഷ്ണ ആദ്യം പ്രവേശിച്ചതെന്ന് പോലീസ് അറിയിച്ചു. തുടർന്ന് നദിയിൽ ഒരു മണിക്കൂറോളം നീന്തി ലക്ഷ്യസ്ഥാനത്തെത്തി.
എന്നാൽ കൃഷ്ണ വന്നത് വെറുതെയായില്ല. മൂന്ന് ദിവസം മുമ്പ് കൊൽക്കത്തയിലെ കാളിഘട്ട് ക്ഷേത്രത്തിൽ വെച്ച് കൃഷ്ണയും കാമുകൻ അഭിക്കും വിവാഹിതരായി. എന്നാൽ, നിയമവിരുദ്ധമായി രാജ്യത്ത് പ്രവേശിച്ചതിന് തിങ്കളാഴ്ച കൃഷ്ണയെ പോലീസ് അറസ്റ്റ് ചെയ്യുകയായിരുന്നു. കൃഷ്ണയെ ബംഗ്ലാദേശ് ഹൈക്കമ്മീഷന് കൈമാറിയേക്കുമെന്ന് ഉന്നത വൃത്തങ്ങൾ അറിയിച്ചു.
