ന്യൂഡൽഹി : എട്ട് വയസുകാരിയെ പീഡിപ്പിച്ച കേസിൽ 25 കാരൻ പിടിയിൽ. തെക്ക് കിഴക്കൻ ഡൽഹിയിലാണ് സംഭവം.എയ്ഡ്സ് രോഗിയായ യുവാവ് രോഗം പടർത്താൻ വേണ്ടിയാണ് കുട്ടിയെ പീഡിപ്പിച്ചത് എന്ന് പോലീസ് കണ്ടെത്തി.
ജൂൺ 14 നായിരുന്നു സംഭവം. ബീഹാർ സ്വദേശികളായ അമ്മയും കുഞ്ഞും ഇയാളുടെ സഹായത്തോടെ പുതിയ വീട്ടിലേക്ക് താമസം മാറിയിരുന്നു. അമ്മ ജോലിക്ക് പോയ സമയം നോക്കി ഇയാൾ വീട്ടിലെത്തി കുട്ടിയെ പീഡിപ്പിക്കുകയായിരുന്നു. ജോലിക്ക് ശേഷം വീട്ടിൽ തിരിച്ചെത്തിയപ്പോൾ കുട്ടിയുടെ ശരീരത്തിൽ പാടുകൾ കണ്ടെത്തിയ അമ്മ പോലീസിനെ സമീപിച്ച് പരാതി നൽകി.
പോലീസ് നടത്തിയ അന്വേഷണത്തിൽ ഇയാൾ നാടുവിട്ടതായി കണ്ടെത്തി. തുടർന്ന് സൈബർ പോലീസിന്റെ സഹായത്തോടെ ബന്ധുവിന്റെ വീട്ടിൽ നിന്നാണ് ഇയാളെ പിടികൂടിയത്. പോലീസ് നടത്തിയ വൈദ്യ പരിശോധനയിൽ ഇയാൾ എച്ച്ഐവി ബാധിതനാണെന്ന് കണ്ടെത്തിയിട്ടുണ്ട്. പീഡനത്തിന് ഇരയായ കുട്ടിയിലേക്ക് രോഗം പടർന്നിട്ടുണ്ടോ എന്ന കാര്യത്തിൽ വ്യക്തത വന്നിട്ടില്ല. കുട്ടിയുടെ അച്ഛൻ വർഷങ്ങൾക്ക് മുൻപ് മറ്റൊരു യുവതിയെ വിവാഹം കഴിച്ച് വീട് വിട്ട് പോയതാണ്.
