തിരുവനന്തപുരം: പതിനായിരം കിലോ ചീഞ്ഞ മീൻ പിടികൂടി. തമിഴ്നാട്ടിൽ നിന്നെത്തിച്ച ചൂരമീൻ കൊല്ലം ആര്യങ്കാവിൽ നിന്നാണ് പിടികൂടിയത്. മൂന്ന് ലോറികളിലായിട്ടാണ് പൂപ്പൽ ബാധിച്ച മീൻ കൊണ്ടുവന്നത്. 10,750 കിലോ മീനാണ് ഭക്ഷ്യസുരക്ഷാ ഉദ്യോഗസ്ഥർ പിടികൂടിയത്.
ട്രോളിംഗ് കാലമായതിനാൽ കേരളത്തിൽ ഇപ്പോൾ മീനിന്റെ ലഭ്യത കുറവാണ്. ഈ സാഹചര്യം മുതലെടുത്താണ് തമിഴ്നാട്ടിൽ നിന്നും കേരളത്തിലേക്ക് മീൻ കടത്താനുള്ള ശ്രമം നടന്നത്. പഴകിയ മീൻ കടത്താനുള്ള ശ്രമം നടക്കുന്നുണ്ടെന്ന് നേരത്തെ തന്നെ ഭക്ഷ്യസുരക്ഷാ വകുപ്പിന് വിവരം ലഭിച്ചിരുന്നു. ഇതേ തുടർന്നാണ് ഇന്നലെ രാത്രിയിൽ പരിശോധന നടത്തിയത്. രാത്രി ഒരു മണിയോടെയാണ് പഴകിയ മീൻ പിടിച്ചെടുത്തത്.
പിടിച്ചെടുത്ത മീനുകളെല്ലാം ചീഞ്ഞതും പൂപ്പൽ ബാധിച്ചവയുമായിരുന്നു. തമിഴ്നാട്ടിലെ നാഗപട്ടണം, കടലൂർ എന്നിവിടങ്ങളിൽ നിന്നാണ് ഈ മീൻ കൊണ്ടുവന്നത്. ആലങ്കോട്, കരുനാഗപ്പള്ളി, അടൂർ എന്നിവിടങ്ങളിലെ ഏജന്റുമാർക്ക് നൽകാനാണ് ഈ മീനുകൾ കൊണ്ടുവരുന്നതെന്നാണ് ലോറിയിലെ ഡ്രൈവർമാർ ഭക്ഷ്യസുരക്ഷാ വകുപ്പിനോട് പറഞ്ഞത്.
Comments