പാലക്കാട്: മണ്ണാർക്കാട് പള്ളിക്കുറുപ്പിൽ ഭർത്താവ് ഭാര്യയെ വെട്ടിക്കൊലപ്പെടുത്തി. വീട്ടിക്കാട് സ്വദേശി ദീപികയാണ് കൊല്ലപ്പെട്ടത്. ഭർത്താവ് അവിനാഷിനെ പോലീസ് കസ്റ്റഡിയിലെടുത്തു.
ഇന്ന് രാവിലെ 8.45-ഓടെയാണ് സംഭവം. കരച്ചിൽ കേട്ട് അയൽ വീട്ടിലുണ്ടായിരുന്ന ബന്ധു ഓടിയെത്തിയപ്പോൾ ദീപിക വെട്ടേറ്റ് കിടക്കുകയായിരുന്നു. ഒന്നര വയസുള്ള മകൻ ഐവിന്റെ കൺമുന്നിൽ വെച്ചായിരുന്നു ദീപികയെ വെട്ടി വീഴ്ത്തിയത്.
വെട്ടേറ്റ യുവതിയെ പെരിന്തൽമണ്ണയിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഇതിനിടെ ഭർത്താവ് അവിനാഷിനെ നാട്ടുകാർ പൊലീസിൽ ഏൽപ്പിച്ചു.
ബെംഗളൂരുവിൽ സ്ഥിരതാമസമായിരുന്ന അവിനാഷും ദീപികയും രണ്ട് മാസം മുമ്പാണ് പള്ളിക്കുറുപ്പിലെ തറവാട്ടു വീട്ടിൽ എത്തിയത്. കുടുംബ കലഹമാണ് കൊലപാതകത്തിന് കാരണമെന്നാണ് പ്രാഥമിക നിഗമനം.
Comments