മുംബൈ: മഹാരാഷ്ട്ര ഉപമുഖ്യമന്ത്രി ദേവേന്ദ്ര ഫഡ്നാവിസിന് ആശംസകൾ നേർന്ന് ശിവസേന എംപി സഞ്ജയ് റാവത്ത്. ബിജെപിയുമായി രാഷ്ട്രീയമായ അഭിപ്രായ വ്യത്യാസമുണ്ട്. എങ്കിലും ദേവേന്ദ്ര ഫഡ്നാവിസിന് തന്റെ ആശംസകൾ അറിയിക്കുമെന്ന് സഞ്ജയ് റാവത്ത് പറഞ്ഞു. മഹാരാഷ്ട്രയുടെ മുഖ്യമന്ത്രിയായി ചുമതലയേറ്റ ഏകനാഥ് ഷിൻഡേക്കും അദ്ദേഹം അഭിനന്ദനങ്ങൾ അറിയിച്ചു. ശിവസേനയെ ഷിൻഡെ വഞ്ചിച്ചുവെന്ന് ആരോപിച്ച നേതാവാണ് സഞ്ജയ് റാവത്ത്.
”ഫഡ്നാവിസിനെ അഭിനന്ദിക്കുന്നു. അത് നമ്മുടെ സംസ്കാരമാണ്. ഇതാണ് നമ്മുടെ മഹാരാഷ്ട്ര. എപ്പോഴൊക്കെ പുതിയ സർക്കാർ രൂപീകരിക്കപ്പെടുന്നുവോ അപ്പോഴൊക്കെ ആശംസകൾ നേരുന്നതാണ് രീതി. ഏകനാഥ് ഷിൻഡെയ്ക്കും ആശംസകൾ. കാരണം ഇത് മഹാരാഷ്ട്രയെക്കുറിച്ചുള്ള കാര്യമാണ്. രാഷ്ട്രീയമല്ല. മഹാരാഷ്ട്രയുടെ ഭാവിക്കായി നല്ല കാര്യങ്ങൾ ചെയ്യുമെന്ന് പ്രതീക്ഷിക്കുന്നു. ഷിൻഡെയും ഫഡ്നാവിസും പരസ്പരം വലംകൈയായി പ്രവർത്തിക്കും.” സഞ്ജയ് റാവത്ത് പറഞ്ഞു.
അതേസമയം ഇപ്പോഴത്തെ മുഖ്യമന്ത്രി ശിവസൈനികനല്ലെന്നും ഉദ്ധവ് താക്കറെ ഉള്ളിടത്താണ് യഥാർത്ഥ ശിവസേനയുള്ളതെന്നും സഞ്ജയ് റാവത്ത് കൂട്ടിച്ചേർത്തു. ഇതിനിടെ കള്ളപ്പണം വെളുപ്പിക്കൽ കേസുമായി ബന്ധപ്പെട്ട് ചോദ്യം ചെയ്യലിനായി സഞ്ജയ് റാവത്ത് ഇന്നും ഇഡിക്ക് മുമ്പിൽ ഹാജരായി.
