ന്യൂഡല്‍ഹി: സിഗരറ്റ് വലിക്കുന്ന കാളിദേവിയുടെ ഡോക്യുമെന്ററി പോസ്റ്റര്‍ പുറത്ത് വിട്ട സംഭവത്തില്‍ ലീന മണിമേഖലയ്‌ക്കെതിരെ ഡല്‍ഹി പോലീസും ഉത്തര്‍പ്രദേശ് പോലീസും കേസ് രജിസ്റ്റര്‍ ചെയ്തു. ചിത്രത്തിന്റെ സംവിധായികയാണ് ലീന മണിമേഖല. ഹിന്ദു ദൈവങ്ങളെ അപകീര്‍ത്തികരമായി ചിത്രീകരിച്ച് മതവികാരം വ്രണപ്പെടുത്തി എന്ന പരാതിയിലാണ് ഇവര്‍ക്കെതിരെ കേസ് രജിസ്റ്റര്‍ ചെയ്തിരിക്കുന്നത്. ഐപിസി സെക്ഷന്‍ 153 എ, 295 എ എന്നിവ പ്രകാരം എഫ്ഐആര്‍ രജിസ്റ്റര്‍ ചെയ്തതായി ഡല്‍ഹി പോലീസ് അറിയിച്ചു. ക്രിമിനല്‍ ഗൂഢാലോചന, മതവികാരം മനപ്പൂര്‍വ്വം വ്രണപ്പെടുത്തല്‍, ഹിന്ദു ദൈവങ്ങളെ അപകീര്‍ത്തികരമായി ചിത്രീകരിക്കല്‍ തുടങ്ങിയ കുറ്റങ്ങള്‍ ചുമത്തിയാണ് യുപി പോലീസ് കേസെടുത്തിരിക്കുന്നത്.
കാളിദേവിയുടെ വേഷം ധരിച്ച സ്ത്രീ പുകവലിക്കുന്ന ചിത്രമാണ് പോസ്റ്ററിലുള്ളത്. എല്‍ജിബിടി സമൂഹത്തിന്റെ പതാകയും ചിത്രത്തില്‍ കാണാം. ഇതിന് പിന്നാലെ ഇവര്‍ക്കെതിരെ വിമര്‍ശനങ്ങള്‍ ഉയരുകയായിരുന്നു. ചിത്രത്തിന്റെ പോസ്റ്ററില്‍ കാളിദേവിയെ മോശമായി ചിത്രീകരിച്ചിരിക്കുന്നതുമായി ബന്ധപ്പെട്ട് നിരവധി പരാതികള്‍ ലഭിച്ചതായി കാനഡയിലെ ഇന്ത്യന്‍ ഹൈക്കമ്മീഷണര്‍ പത്രക്കുറിപ്പിലൂടെ അറിയിച്ചു. ഇവരുടെ അറസ്റ്റ് ആവശ്യപ്പെട്ട് ‘അറസ്റ്റ്‌ലീനമണിമേഖല’ എന്ന ഹാഷ് ടാഗും ട്വിറ്ററില്‍ ട്രെന്‍ഡിംഗ് ആണ്.
എന്നാല്‍ പ്രതിഷേധങ്ങളെ ഭയക്കുന്നില്ലെന്ന് ലീന മണിമേഖല ട്വീറ്റ് ചെയ്തു. എനിക്ക് നഷ്ടപ്പെടാനൊന്നുമില്ല, ഒന്നിനേയും ഭയക്കാതെ സംസാരിക്കുന്നവര്‍ക്ക് ഒപ്പം നില്‍ക്കാനാണ് ഞാന്‍ ഇഷ്ടപ്പെടുന്നത്. അതിന്റെ വില എന്റെ ജീവനാണെങ്കില്‍ ഞാന്‍ തരാം. അറസ്റ്റ് ലീന മണിമേഖല എന്ന ഹാഷ്ടാഗിന് പകരം ലവ് യു ലീന മണിമേഖല എന്ന ഹാഷ്ടാഗ് എല്ലാവരും ഇടണമെന്നും ഇവര്‍ ആവശ്യപ്പെടുന്നു.
