തിരുവനന്തപുരം: മന്ത്രി സജി ചെറിയാന്റെ വിവാദ പ്രസംഗം ചോർത്തി നൽകിയതാണെന്ന് സംശയം. സിപിഎം മല്ലപ്പള്ളി ഏരിയാ കമ്മിറ്റി യോഗത്തിലാണ് ഇത്തരത്തിലൊരു സംശയമുയർന്നത്.
പ്രസംഗം മാദ്ധ്യമങ്ങൾക്ക് കൈമാറിയതിന് പിന്നിൽ പാർട്ടിയുമായി ബന്ധമുള്ളവരെന്ന് ഏരിയ കമ്മറ്റി. വിഭാഗീയ പ്രവർത്തനങ്ങൾക്ക് നേതൃത്വം നൽകുന്നവരാണ് പ്രസംഗം ചോർത്തിയതെന്നും വിമർശനം.
ഞായറാഴ്ചയാണ് മന്ത്രി പത്തനംതിട്ടയിലെ മല്ലപ്പള്ളിയിൽ വിവാദ പ്രസംഗം നടത്തിയത്. എന്നാൽ ഇതിന്റെ വീഡിയോ രണ്ടു ദിവസത്തിന് ശേഷം ചൊവ്വാഴ്ച പ്രചരിച്ചതിൽ ദുരൂഹതയുണ്ടെന്നാണ് ഏരിയ കമ്മിറ്റിയുടെ വിലയിരുത്തൽ.
പാർട്ടി കുടുംബാംഗങ്ങൾ മാത്രമാണ് പരിപാടിയിൽ പങ്കെടുത്തത്. മന്ത്രിയുടെ ദീർഘമായ പ്രസംഗം ഏരിയ കമ്മിറ്റിയുടെ ഫേസ്ബുക്ക് പേജിലുണ്ടായിരുന്നു. എന്നാൽ ഇത് പിന്നീട് നീക്കം ചെയ്യുകയായിരുന്നു. എന്നാൽ പ്രസംഗത്തിലെ വിവാദ ഭാഗങ്ങൾ പാർട്ടിയിലെ തന്നെ ചിലർ മന:പൂർവ്വം പ്രചരിപ്പിച്ചുവെന്നാണ് പ്രാഥമികവിലയിരുത്തൽ. സംഭവം പാർട്ടി തലത്തിൽ അന്വേഷിക്കണമെന്നും ചില അംഗങ്ങൾ ആവശ്യപ്പെട്ടിട്ടുണ്ട്.
Comments