ലക്‌നൗ: ദീർഘനാളത്തെ അസുഖത്തെ തുടർന്ന് ഉത്തർപ്രദേശ് മുൻ മുഖ്യമന്ത്രി മുലായം സിംഗ് യാദവിന്റെ ഭാര്യ സാധന യാദവ് അന്തരിച്ചു. യുപി ഉപമുഖ്യമന്ത്രി കേശവ് പ്രസാദ് മൗര്യ, എംപി സിഎം ശിവരാജ് സിംഗ് ചൗഹാൻ, മുഖ്യമന്ത്രി യോഗി ആദിത്യനാഥ് തുടങ്ങിയവർ അനുശോചനമറിയിച്ചു.
സാധനയുടെ വിയോഗം ദുഖകരമാണെന്നും ദുഃഖിതരായ കുടുംബാംഗങ്ങൾക്കൊപ്പം അനുശോചനം രേഖപ്പെടുത്തുന്നുവെന്നും യോഗി ആദിത്യനാഥ് അനുശോചിച്ചു. വേർപാട് താങ്ങാനുള്ള ശക്തി നൽകി ശ്രീരാമൻ അനുഗ്രഹിക്കട്ടെയെന്നും കൂട്ടിച്ചേർത്തു. പരേത്മാവിന് നിത്യശാന്തി എന്നാണ് എംപി ശിവരാജ് സിംഗ് ചൗഹാൻ പറഞ്ഞത്.
കഴിഞ്ഞ നാലു ദിവസമായി ശ്വാസകോശ അണുബാധയെ തുടർന്ന് ഗുരുഗ്രാമിലെ ആശുപത്രിയിൽ ചികിത്സയിലായിരുന്നു. ആരോഗ്യനിലയിൽ വഷളായതിനെ തുടർന്ന് ഐസിയുവിൽ പ്രവേശിപ്പിച്ചിരുന്നു. മൃതദേഹം ലക്‌നൗവിലെ വസതിയിലേക്ക് കൊണ്ടുപോയി. വൈകാതെ മുലായം സിംഗ് യാദവ് എത്തിച്ചേരുമെന്ന് അറിയിച്ചു.
മുലായം സിംഗിന്റെ രണ്ടാം ഭാര്യയാണ് സാധന യാദവ്. പ്രതിക് യാദവ് മകനും ബിജെപി നേതാവായ അപർണ യാദവ് മരുമകളുമാണ്. സാധന സിംഗ് വിവാഹത്തിന് മുൻപ് രാഷ്‌ട്രീയത്തിൽ സജീവമായിരുന്നു.
